Գերմանական դրոնների փորձարկումները Ուկրաինայում տապալվել են

Ուկրաինան դադարեցրել է գերմանական Helsing ընկերությունից լրացուցիչ հարվածային անօդաչու թռչող սարքերի պատվերները՝ ճակատային գծի մոտ անցկացված անհաջող փորձարկումներից հետո։ Այդ մասին հայտնում է Bloomberg-ը՝ հղում անելով Գերմանիայի զինված ուժերի (բունդեսվերի) ներքին զեկույցին։

Խոսքը վերաբերում է HX-2 մոդելի դրոններին, որոնք ունեն մինչև 100 կմ թռիչքային հեռավորություն և կարող են զարգացնել մինչև 220 կմ/ժ արագություն։ Դրանք համալրված են արհեստական բանականության վրա հիմնված ծրագրային ապահովմամբ՝ էլեկտրոնային պայքարի միջոցները հաղթահարելու համար, սակայն պարզվել է, որ Ուկրաինան չունի համապատասխան ԱԲ բաղադրիչներ, ինչի հետևանքով օպերատորի և դրոնի միջև կապը խոցելի է դարձել ՌԷՊ ազդեցության նկատմամբ։

Բացի այդ, փորձարկումների ընթացքում խնդիրներ են արձանագրվել HX-2-ի մեկնարկի հետ կապված․ թռիչք է իրականացրել դրոնների միայն մոտ մեկ քառորդը, ինչը պայմանավորված է եղել գործարկման կատապուլտի մեխանիկական խափանումով։ Անհաջող փորձարկումները նվազեցրել են ընկերության արտադրանքի պահանջարկը, և Գերմանիան, որը ֆինանսավորում է դրոնների մատակարարումը Կիևին, չի նախատեսում նոր պատվերներ։ Helsing ընկերությունում, սակայն, հայտարարել են, որ տեղյակ չեն պաշտպանության նախարարության զեկույցից և խնդրահարույց տվյալները համարում են ոչ հավաստի՝ նշելով, որ ուկրաինական բանակի առնվազն վեց ստորաբաժանումներ հետաքրքրվել են HX-2 մոդելով։