Իսպանիայում արագընթաց գնացքների բախման զոհերի թիվը հասել է 39-ի

Իսպանիայի հարավում տեղի ունեցած արագընթաց երկու գնացքների բախման հետևանքով զոհերի թիվը հասել է 39-ի, ևս 152 մարդ տարբեր աստիճանի վնասվածքներ է ստացել։ Այդ մասին հայտնում է Reuters-ը՝ հղում անելով պետական RTVE հեռուստաընկերությանը և ոստիկանության տվյալներին։

Վթարը տեղի է ունեցել կիրակի օրը՝ տեղական ժամանակով ժամը 19։45-ին, Կորդոբայի նահանգի Ադամուս բնակավայրի մոտ, Մադրիդից շուրջ 360 կիլոմետր դեպի հարավ։ Ըստ հաղորդումների՝ մեկ արագընթաց գնացքը դուրս է եկել ռելսերից և բախվել հակառակ ուղղությամբ ընթացող երկրորդ գնացքին։ Դեպքի հետևանքով երկուշաբթի օրը չեղարկվել է ավելի քան 200 գնացքի երթուղի Մադրիդի և Անդալուսիայի միջև, ներառյալ Կորդոբա, Սևիլյա և Գրանադա քաղաքները։

Իսպանիայի վարչապետ Պեդրո Սանչեսը չեղարկել է օրվա բոլոր միջոցառումները՝ կապված ողբերգության հետ։ Նախնական տվյալներով՝ երկու գնացքներում եղել է մոտ 400 ուղևոր, հիմնականում Իսպանիայի քաղաքացիներ, որոնք հանգստյան օրերից հետո վերադառնում էին Մադրիդ կամ մեկնում մայրաքաղաքից։ Վթարի պատճառները դեռևս պարզ չեն, և հետաքննությունը շարունակվում է, հայտնել է երկրի տրանսպորտի նախարար Օսկար Պուենտեն։