ԱՄՆ նախկին փոխնախագահ Մայք Փենսը քննադատել է Թրամփի հավակնությունները Գրենլանդիայի հարցում

ԱՄՆ նախկին փոխնախագահ Մայք Փենսը հայտարարել է, որ Դոնալդ Թրամփի կողմից Գրենլանդիայի հարցում կիրառվող մեթոդները հակաարդյունավետ են, թեև Վաշինգտոնը շահագրգռված է տարածաշրջանի վերահսկողության հարցում։ Այդ մասին նա ասել է CNN-ի «State of the Union» հաղորդման ընթացքում։

Փենսի խոսքով՝ ներկայիս մոտեցումը կարող է լուրջ վնաս հասցնել ԱՄՆ-ի հարաբերություններին ոչ միայն Դանիայի, այլև ՆԱՏՕ-ի մյուս դաշնակիցների հետ։ Նա ընդգծել է, որ խնդիրն այն չէ, թե ինչ նպատակ է հետապնդում Թրամփը, այլ այն, թե ինչ ձևով է փորձում հասնել դրան։

Նախկին փոխնախագահը նաև մտահոգություն է հայտնել Թրամփի կողմից կասկածելի սահմանադրական լիազորությունների կիրառման կապակցությամբ՝ մասնավորապես ՆԱՏՕ-ի դաշնակից երկրների նկատմամբ միակողմանի մաքսատուրքերի սահմանման միջոցով։ Ավելի վաղ եվրոպացի մի շարք առաջնորդներ զգուշացրել էին, որ Գրենլանդիայի շուրջ նման քաղաքականությունը կարող է վտանգի տակ դնել ռազմական դաշինքի անխախտելիությունը։