Արհեստական բանականության (AI) տվյալների կենտրոնները ծանրաբեռնում են ԱՄՆ էլեկտրացանցը

Արհեստական բանականության ոլորտում մրցակցությունը ստիպում է ամերիկյան տեխնոհսկաներին արագ տեմպերով կառուցել տվյալների կենտրոններ, սակայն ԱՄՆ-ի հնացած էլեկտրացանցը կարող է չդիմանալ էներգիայի պահանջարկի կտրուկ աճին։ Reuters-ի փոխանցմամբ՝ էլեկտրաէներգիայի հավելյալ ծախսերի զգալի մասը արդեն իսկ բեռնվում է շարքային սպառողների վրա, ինչի հետևանքով իշխանությունները փորձում են մեղմել գների աճը։

ԱՄՆ-ի հյուսիս-արևելյան նահանգների մի խումբ նահանգապետներ և Թրամփի վարչակազմը դիմել են երկրի խոշորագույն էլեկտրացանցի օպերատոր PJM-ին՝ առաջարկելով արտակարգ էներգետիկ աճուրդ անցկացնել, որպեսզի տեխնոլոգիական ընկերությունները մասնակցեն տվյալների կենտրոնների առաջացրած ծախսերի փոխհատուցմանը։ Միևնույն ժամանակ, տվյալների կենտրոնների խոշորագույն կուտակումը գտնվում է Վիրջինիայում, իսկ նոր նախագծեր են զարգանում նաև այլ նահանգներում՝ երբեմն պետական հարկային արտոնությունների միջոցով։

Փորձագետների գնահատմամբ՝ տվյալների կենտրոնների էներգասպառումը 2028 թվականին կարող է հասնել ԱՄՆ-ում արտադրվող էլեկտրաէներգիայի մինչև 12 տոկոսին՝ 2023 թվականի 4,4 տոկոսի դիմաց։ Բացի այդ, այդ կենտրոնները մեծ քանակությամբ ջուր են պահանջում սառեցման համար, ինչն էլ ավելի է բարդացնում ենթակառուցվածքների ծանրաբեռնվածությունը։ Այս ֆոնին մի շարք նահանգներ և ընկերություններ արդեն քննարկում են ավելի բարձր սակագների կամ հատուկ վճարների ներդրումը, որպեսզի տվյալների կենտրոնների զարգացումը չազդի բնակչության կենսապայմանների վրա։