Թրամփը հայտարարել է, որ Նոբելյան մրցանակ չստանալու պատճառով այլևս պարտավոր չէ մտածել «աշխարհի խաղաղության» մասին

ԱՄՆ նախագահ Դոնալդ Թրամփը հայտարարել է, որ այլևս պարտավոր չի համարում իրեն մտածել գլոբալ խաղաղության մասին և կարող է կենտրոնանալ բացառապես ԱՄՆ շահերի վրա, քանի որ չի արժանացել Նոբելյան խաղաղության մրցանակի։ Այդ մասին ասվում է Նորվեգիայի վարչապետ Յոնաս Գար Ստյորեին ուղղված նրա նամակում, որի բովանդակությունը հրապարակել է Newshour-ի թղթակից Նիկ Շիֆրինը՝ հղում անելով մի քանի պաշտոնյաների։

Նամակում Թրամփը նշում է, որ Նորվեգիայի որոշումը՝ իրեն չպարգևատրել Նոբելյան մրցանակով՝ «ավելի քան ութ պատերազմ կանխելու համար», փոխել է իր մոտեցումը։ Նրա խոսքով՝ այժմ նա կարող է առաջնորդվել նրանով, «ինչն օգտակար և ճիշտ է Միացյալ Նահանգների համար»։ Թրամփը նաև կասկածի տակ է դրել Դանիայի իրավունքը Գրենլանդիայի նկատմամբ՝ պնդելով, որ Կոպենհագենը ի վիճակի չէ պաշտպանել կղզին Ռուսաստանից կամ Չինաստանից։

ԱՄՆ նախագահը հավելել է, որ ՆԱՏՕ-ի համար արել է ավելին, քան որևէ այլ առաջնորդ դաշինքի ստեղծումից ի վեր, և այժմ հերթը դաշինքինն է՝ քայլեր անել ԱՄՆ-ի համար։ Նրա համոզմամբ՝ «աշխարհը անվտանգ չի լինի, եթե Միացյալ Նահանգները չունենա Գրենլանդիայի լիակատար և ամբողջական վերահսկողությունը»։ Ավելի վաղ Թրամփի այս դիրքորոշումը քննադատել էր ԱՄՆ նախկին փոխնախագահ Մայք Փենսը՝ այն անվանելով հակաարդյունավետ։