Կյանքը երկարացնելու պարզ, բայց անսպասելի միջոց է բացահայտվել

Ֆիզիկական ակտիվությունը նվազեցնում է վաղաժամ մահվան ռիսկը, սակայն որոշիչ գործոնը կարող է լինել ոչ թե ծանրաբեռնվածության քանակը, այլ դրա բազմազանությունը։ Նման եզրակացության են եկել գիտնականները՝ վերլուծելով երկու խոշոր երկարաժամկետ հետազոտությունների տվյալներ։ Արդյունքները հրապարակվել են BMJ Medicine գիտական հանդեսում։

Ուսումնասիրության ընթացքում ավելի քան 110 հազար մարդու ֆիզիկական ակտիվությունը հետևվել է ավելի քան 30 տարի՝ հաշվի առնելով ոչ միայն շարժման ընդհանուր ժամանակը, այլև տարբեր ակտիվությունների տեսակները՝ քայլքից ու վազքից մինչև ուժային մարզումներ, լող և այգեգործական աշխատանքներ։ Պարզվել է, որ այն մարդիկ, ովքեր պարբերաբար համադրել են տարբեր տեսակի ֆիզիկական ակտիվություններ, ունեցել են մահվան ավելի ցածր ռիսկ՝ նույնիսկ այն դեպքում, երբ նրանց ընդհանուր ծանրաբեռնվածությունը նույնն է եղել, ինչ միայն մեկ մարզաձևով զբաղվողներինը։

Գիտնականները նշել են նաև, որ ֆիզիկական ակտիվության և կյանքի տևողության միջև կապը գծային չէ․ դրական ազդեցությունը աճում է մինչև որոշակի մակարդակ, ապա կայունանում։ Ամենաօպտիմալ արդյունքը դիտվել է շաբաթական մոտ 20 մետաբոլիկ համարժեք ժամ (MET) ծանրաբեռնվածության դեպքում, իսկ դրանից բարձր ցուցանիշները էական լրացուցիչ օգուտ չեն տվել։ Հետազոտողները շեշտում են, որ ակտիվ կենսակերպը շարունակում է մնալ առողջության կարևորագույն գործոններից մեկը, սակայն տարբեր տեսակի շարժումների համադրումը կարող է առավել կայուն և արդյունավետ լինել երկարաժամկետ հեռանկարում։