Բժիշկը խորհուրդ է տալիս քաղցկեղի բուժման ընթացքում խուսափել ուժեղ մշակված սննդից

Քաղցկեղի բուժում անցնող մարդկանց խորհուրդ է տրվում հրաժարվել բարձր աստիճանի մշակված սննդամթերքից։ Այդ մասին հայտնել է իտալացի համաճարակաբան և պրոֆիլակտոլոգ Մարիալաուրա Բոնաչչիոն՝ ներկայացնելով իր հետազոտության արդյունքները, որոնք հրապարակվել են Mirror-ում։ Խոսքը վերաբերում է, օրինակ, պաղպաղակին, մսային կիսապատրաստուկներին, չիպսերին, զանգվածային արտադրության հացին, որոշ չոր նախաճաշերին, թխվածքաբլիթներին, պատրաստի ուտեստներին և գազավորված ըմպելիքներին։

Հետազոտության համաձայն՝ նման սննդամթերքի հաճախակի օգտագործման դեպքում քաղցկեղի բուժման ընթացքում մահվան հավանականությունը կարող է գրեթե 60 տոկոսով բարձր լինել։ Բոնաչչիոն նշել է, որ արդյունաբերական մշակման ընթացքում կիրառվող նյութերը կարող են ազդել նյութափոխանակության վրա, խախտել աղիքային միկրոֆլորան և առաջացնել բորբոքային գործընթացներ, նույնիսկ եթե սննդամթերքի կալորիականությունը կամ սննդային բաղադրությունը նման է բնական արտադրանքին։

Մասնագետը խորհուրդ է տալիս քաղցկեղով հիվանդներին նվազեցնել նման սննդի օգտագործումը և նախընտրել տանը պատրաստված, նվազ մշակված թարմ ուտեստներ։ Նրա խոսքով՝ պարզ միջոց է ուշադրություն դարձնել պիտակներին․ եթե արտադրանքը պարունակում է ավելի քան հինգ բաղադրիչ կամ սննդային հավելումներ, մեծ հավանականությամբ այն բարձր աստիճանի մշակման է ենթարկվել։