Գիտնականները նշել են մարդու ֆիզիկական ուժի գագաթնակետի տարիքը

Շվեդ գիտնականների երկարամյա ուսումնասիրության համաձայն՝ մարդկանց մեծամասնության ֆիզիկական պատրաստվածությունը գագաթնակետին է հասնում մոտավորապես 26-36 տարեկանում, որից հետո սկսվում է աստիճանական նվազում։ Հետազոտության արդյունքները հրապարակվել են Journal of Cachexia, Sarcopenia and Muscle գիտական ամսագրում։

Գիտնականները վերլուծել են Շվեդիայի 427 բնակչի տվյալները՝ նրանց հետևելով 16-ից մինչև 63 տարեկան ժամանակահատվածում։ Պարզվել է, որ առավելագույն աէրոբ և մկանային դիմացկունությունը ձևավորվում է կյանքի երրորդ տասնամյակում։ Այնուհետև ցուցանիշները սկզբում նվազում են տարեկան մոտ 0.3-0.6%-ով, իսկ 50 տարեկանից հետո՝ մինչև 2-2.5%-ով։ 63 տարեկանում ֆիզիկական աշխատունակությունը կարող է լինել գագաթնակետից 30-48%-ով ցածր։

Միաժամանակ հետազոտողները նշում են, որ ակտիվ ապրելակերպը կարող է զգալիորեն դանդաղեցնել այս գործընթացը։ Երիտասարդ տարիներին ֆիզիկապես ակտիվ մարդիկ կամ նրանք, ովքեր սկսել են կանոնավոր մարզվել ավելի ուշ, կյանքի տարբեր փուլերում պահպանել են ավելի բարձր ֆիզիկական ցուցանիշներ։