Անսպասելի բացահայտում․ քայլելու արագությունը կարող է կանխատեսել վաղ մահը

Գիտնականները պարզել են, որ քայլելու արագությունը կարող է ավելի ճշգրիտ ցուցանիշ լինել վաղաժամ մահվան ռիսկը գնահատելու համար, քան ավանդական բժշկական չափանիշները՝ ինչպես խոլեստերինի մակարդակը կամ արյան ճնշումը։ Այս եզրակացության են եկել Լեսթերի համալսարանի հետազոտողները՝ ուսումնասիրելով ավելի քան 400 հազար մարդու տվյալներ UK Biobank-ի բազայից։ Արդյունքները հրապարակվել են Mayo Clinic Proceedings գիտական հանդեսում։

Ուսումնասիրության շրջանակում գնահատվել են առողջական վիճակը բնութագրող հինգ հիմնական գործոններ՝ քայլելու արագությունը, ձեռքի սեղմման ուժը, հանգստի վիճակում սրտի զարկերի հաճախությունը, քնի տևողությունը և ֆիզիկական ակտիվության մակարդակը։ Պարզվել է, որ հենց քայլելու արագությունն է ամենաուժեղ ցուցիչը մահացության կանխատեսման հարցում, հատկապես քրոնիկական հիվանդություններ ունեցող մարդկանց դեպքում։

Հետազոտողները նշում են, որ որոշ դեպքերում այս պարզ ցուցանիշը նույնիսկ գերազանցում է դասական ռիսկային գործոններին։ Նրանց կարծիքով՝ նման հեշտ չափվող տվյալները կարող են կիրառվել առողջության արագ գնահատման համար՝ առանց բարդ անալիզների, ինչը հնարավորություն է տալիս վաղ փուլում հայտնաբերել ռիսկային խմբերը և ավելի արդյունավետ կանխարգելում իրականացնել։