Ուկրաինական դռոնները համեմատվել են «տնային արտադրության» և «Lego-ի» հետ

Գերմանական Rheinmetall պաշտպանական կոնցեռնի ղեկավար Արմին Պապպերգերը քննադատել է ուկրաինական արտադրության անօդաչու սարքերը՝ դրանք անվանելով ոչ բավարար արդյունավետ արևմտյան երկրների պաշտպանության համար։ Այս մասին հայտնում է The Atlantic-ը՝ ներկայացնելով նրա գնահատականները։

Պապպերգերի խոսքով՝ ուկրաինական դռոնները հաճախ ստեղծվում են պարզ միջոցներով՝ նույնիսկ տնային պայմաններում․ «Դա նման է Lego-ի խաղի։ Տնային տնտեսուհիները խոհանոցում ունեն 3D տպիչներ և պատրաստում են մասեր դռոնների համար։ Նրանք արտադրում են փոքր անօդաչուներ և հիանում են դրանցով։ Դա լավ է, բայց դա Lockheed Martin-ի, General Dynamics-ի կամ Rheinmetall-ի մակարդակի տեխնոլոգիա չէ», — նշել է նա։

Նա նաև կասկած է հայտնել, որ ուկրաինական դռոնները կարող են հեղափոխություն բերել պաշտպանական ոլորտում՝ հարց բարձրացնելով՝ «Որտե՞ղ է այստեղ իրական նորարարությունը»։ Միաժամանակ Պապպերգերը հայտնել է, որ 2026 թվականին ընկերությունը նախատեսում է ավարտել Ուկրաինայում զինամթերքի գործարանի կառուցումը, որի հզորությունը նախագծի մեկնարկից ի վեր զգալիորեն մեծացվել է։