Փաշինյանի հետ միջադեպի մասնակից երիտասարդներին մեղադրանքեր առաջադրվեցին․ մանրամասներ

Նիկոլ Փաշինյանի հետ Սուրբ Աննա եկեղեցում տեղի ունեցած միջադեպի պատճառով Քննչական կոմիտեն այնուամենայնիվ մեղադրանքներ առաջադրեց դպրոցական Դավիթ և Միքայել Մինասյանների, ինչպես նաև ազատամարտիկ Գևորգ Գևորգյանի նկատմամբ:

«Սուրբ Աննա եկեղեցում միջադեպի առթիվ վարույթի նախաքննության ընթացքում Դ.Մ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 1-ին մասով (խուլիգանությունը) և 452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը), Մ.Մ.-ի նկատմամբ՝ 46-297-րդ հոդվածի 1-ին մասով (խուլիգանությանն աջակցելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելուն աջակցելը) և Գ.Գ.-ի նկատմամբ՝ 46-297-րդ հոդվածի 1-ին մասով (խուլիգանությունը կազմակերպելը) և 46-452-րդ հոդվածի 3-րդ մասով (պաշտոնատար անձի օրինական ծառայողական կամ քաղաքական գործունեությանը միջամտելը կազմակերպելը)», – ասված է ՔԿ-ի հաղորդագրությունում:

Հիշեցնենք՝ քննիչները երեկ երեկոյան խուզարկել են Փաշինյանի հետ միջադեպի մասնակից երիտասարդների տունը, սակայն ոչինչ չէին հայտնաբերել։ 

«Որևէ բան չէր կարող լինել, որ հայտնաբերեին։ Իրենք փնտրում էին, իբրև թե, նախագիծը՝ Նիկոլ Փաշինյանի քաղաքական գործունեությանը միջամտելու՝ բռնության կիրառմամբ և խուլիգանությամբ։ Կրիչ, հեռախոս, այսպիսի բաներ էին փնտրում։ Իբր Գևորգ Գևորգյանի հետ պայմանավորվածություն, նախագիծ պիտի ունենային դպրոցական տղաները»,- մանրամասնել էր փաստաբանը։