Ռեստորանային բիզնեսը ճգնաժամի մեջ․ փակված օբյեկտների թիվը կտրուկ աճել է. ՌԴ

2026 թվականի առաջին եռամսյակում Ռուսաստանում հանրային սննդի ոլորտում փակվել է շուրջ 11,2 հազար կազմակերպություն, ինչը 31,28 տոկոսով ավել է նախորդ տարվա նույն ժամանակահատվածի համեմատ։ Այս տվյալները հրապարակել է «Коммерсантъ»-ը՝ հղում անելով «Контур.Фокус»-ին։ Թեև նոր գրանցված բիզնեսների թիվը նույնպես աճել է՝ հասնելով 12,5 հազարի (20,84% աճ), ոլորտում ընդհանուր պատկերը շարունակում է մնալ բացասական։

Մասնագետների գնահատմամբ՝ այս վիճակը վկայում է ոլորտի լուրջ անկման մասին։ Ռեստորանների, սրճարանների և բարերի թիվը ռուսական խոշոր քաղաքներում կրճատվել է՝ համապատասխանաբար 5%, 6% և 11%։ Հիմնական պատճառը այցելությունների կտրուկ նվազումն է, ինչը ստիպում է բիզնեսներին փակվել կամ վերակազմակերպվել։ Միևնույն ժամանակ սպառողները ավելի հաճախ ընտրում են էժան սեգմենտի սննդի կետեր, ինչը հաստատվում է արագ սննդի օբյեկտներում վճարումների աճով։

Փորձագետները նշում են, որ բիզնեսների մի մասը արհեստականորեն բաժանվում է փոքր ընկերությունների՝ ավելացված արժեքի հարկի (ԱԱՀ) նոր կանոններից խուսափելու համար։ Սակայն նույնիսկ այդ քայլերը չեն փրկում ոլորտը․ ռեստորանների սեփականատերերը բախվում են ծախսերի աճի, աշխատուժի պակասի և եկամտաբերության անկման հետ։ Չնայած իշխանությունների որոշմանը մինչև 2026-ի վերջ ԱԱՀ չգանձել փոքր շրջանառություն ունեցող բիզնեսներից, ոլորտի ներկայացուցիչները համոզված են՝ ճգնաժամը դեռ երկար կշարունակվի։