Զորակոչից մինչև ողբերգություն․ ի՞նչ է տեղի ունեցել զինվորի հետ. «Ժողովուրդ»
Հայկական Մամուլ
«Ժողովուրդ» օրաթերթը գրում է. «Երեկ մահացած զինվորը, թեև առողջական որոշակի խնդիրներ է ունեցել, սակայն նրան համարել են պիտանի և զինծառայության զորակոչել։ «Ժողովուրդ» օրաթերթը տեղեկացավ, որ իրավապահ համակարգում մի քանի վարկածներով քննություն է ընթանում այս առիթով։
Մասնավորապես, փորձում են պարզել՝ նրա առողջական խնդիրը կարող էր լինել ինքնասպանության պատճառ, թե՞ այլ հարց կա։
Հիշեցնենք, որ, ըստ պաշտոնական հաղորդագրության, հունիսի 2-ին՝ ժամը 00:10-ի սահմաններում, հայտնաբերվել է ՊՆ N զորամասի զինծառայող Արամայիս Մերուժանի Գևորգյանի դին։
Դեպքի հանգամանքներն ամբողջովին պարզելու նպատակով ընթանում է քննություն։
2024 թվականի ապրիլի 18-ին ՀՀ պաշտպանության նախարար Սուրեն Պապիկյանը հայտնել էր. «Հայաստանում որոշ հիվանդությունների դեպքում զինծառայողը կհամարվի պիտանի, բայց զինծառայություն կանցնի սահմանափակումով։
«Առանց կլինիկական դրսևորումների և ախտաբանական փոփոխությունների կիստաներ ունեցող կամ առանց վարքային խանգարումների գրագիտության խնդիրներ ունեցող անձանց զինվորական ծառայությունը, ինչպես նաև ուռոլոգիական և նյարդաբանական համակարգի հիվանդություններ ունեցող զինծառայողները չեն խուսափի զինծառայությունից, այլ կծառայեն որոշակի սահմանափակումներով»,- կառավարության նիստին ասել էր պաշտպանության նախարարը։
Նրա խոսքով՝ կան վիճակագրական տվյալներ, ըստ որոնց՝ նկատվում է մի շարք հիվանդություններով ծառայությունից անհարկի ազատման դեպքերի պրոգրեսիվ դինամիկա։
Նրա խոսքով՝ կիստաների առկայության սահմանափակումները սահմանվելու են զորամասի բժշկի ցուցումով, գիշերամիզություն ունեցող զինծառայողի ծառայությունը շարունակվելու է օրվա հեշտացված կարգավիճակով, իսկ առանց վարքային խանգարումների մանկավարժական բարձիթողի վիճակ ունեցող զինծառայողները չեն ընդգրկվի մարտական հերթապահության մեջ, կարգելվի նրանց վարել տրանսպորտային միջոցներ և տեխնիկա, ղեկավարել անձնակազմ։
«Նույն գիշերամիզությամբ էլի զորակոչվում են բանակ, խնդիրը հետագայում ծառայությունից ազատվելն է։ Մենք ունենք վիճակագրական տվյալներ, ըստ որոնց՝ նկատվում է վերոնշյալ հիվանդություններով ազատումների դեպքերի պրոգրեսիվ դինամիկա»,- ընդգծել էր Պապիկյանը։
Նախարարը վստահեցրել էր, որ իր թվարկած հիվանդությունները ոչ մի կերպ չեն կարող զինծառայության ընթացքում վնաս հասցնել մարդու առողջությանը։
Արդյոք այս դեպքը կապ ունի զինվորի առողջական խնդրի և նրա սահմանափակումով ծառայության հետ, հուսանք, կպարզի քննությունը»։
ՈՒՂԻՂ ԵԹԵՐ
Ամենադիտված 
Մահացել է երգիչ Հովհաննես Գրիգորյանը
