ԱՄՆ-ը նոր մաքսատուրքեր է առաջարկել 60 տնտեսությունների նկատմամբ

ԱՄՆ վարչակազմը առաջարկել է լրացուցիչ՝ 10 և 12,5 տոկոս մաքսատուրքեր սահմանել 60 երկրների և տնտեսությունների ներմուծման նկատմամբ՝ հայտարարելով, որ դրանք բավարար քայլեր չեն ձեռնարկում հարկադիր աշխատանքի կիրառմամբ արտադրված ապրանքների շրջանառությունը սահմանափակելու ուղղությամբ։

Առաջարկը ներկայացրել է ԱՄՆ առևտրային ներկայացուցչի գրասենյակը (USTR)՝ «301-րդ բաժնի» հետաքննության շրջանակում։ Վաշինգտոնը պնդում է, որ նման իրավիճակը խաթարում է մրցակցային պայմանները և վնասում ամերիկյան արտադրողներին։

Ըստ ներկայացված նախագծի՝ 10 տոկոս լրացուցիչ մաքսատուրք կարող է կիրառվել մի շարք խոշոր առևտրային գործընկերների նկատմամբ, այդ թվում՝ Կանադայի, Եվրոպական միության, Մեծ Բրիտանիայի, Մեքսիկայի, Թայվանի, Մալայզիայի, Բանգլադեշի և մի շարք այլ երկրների։ Մնացած 45 երկրների համար նախատեսվում է 12,5 տոկոս դրույքաչափ։

Միաժամանակ ԱՄՆ-ը նախատեսում է բացառություններ սահմանել որոշ ապրանքների համար, այդ թվում՝ էներգակիրների, հազվագյուտ մետաղների, դեղագործական արտադրանքի, սուրճի, տավարի մսի, որոշ մրգերի ու բանջարեղենի, քիմիական նյութերի և ավիացիոն բաղադրիչների նկատմամբ։

Առաջարկվող սահմանափակումների վերաբերյալ հանրային քննարկումները կշարունակվեն մինչև հուլիսի 6-ը, իսկ հանրային լսումները նախատեսված են հուլիսի 7-ին։