Զելենսկին խոստացել է պատասխանել Ռուսաստանի հասցրած հարվածներից հետո

Ուկրաինայի նախագահ Վլադիմիր Զելենսկին հայտարարել է, որ պատասխան կլինի Ռուսաստանի կողմից իրականացված հարվածներից հետո։ Այդ մասին հայտնում է ուկրաինական «Страна.ua» պարբերականը։ Լրագրողների հարցին, թե ինչ կասեր այժմ Ռուսաստանի նախագահ Վլադիմիր Պուտինին, Զելենսկին կարճ պատասխանել է․ «Մենք դեռ կասենք»։ Նշվում է, որ հայտարարությունն արվել է Կիևո-Պեչորյան լավրա կատարած այցի ընթացքում։

Ավելի վաղ Ռուսաստանի պաշտպանության նախարարությունը հայտնել էր, որ իրականացվել են բարձր ճշգրտության հարվածներ՝ ի պատասխան նախորդ հարձակումների։ Ըստ գերատեսչության՝ թիրախ են դարձել ռազմաարդյունաբերական օբյեկտներ և տարածքային համալրման կենտրոններ Կիևում, Խարկովում և Դնեպրոպետրովսկում։

ՌԴ պաշտպանության նախարարությունը նաև հայտարարել էր, որ Կիևո-Պեչորյան լավրայի տարածքում բռնկված հրդեհը, ըստ իրենց վարկածի, կապված է հակաօդային պաշտպանության համակարգի աշխատանքի հետ։ Ուկրաինական կողմի պաշտոնական արձագանքը տվյալ հայտարարության վերաբերյալ հրապարակման պահին չէր ներկայացվել։