Լուկաշենկոն հայտարարել է Պուտինի հետ մոտալուտ հանդիպման մասին

Բելառուսի նախագահ Ալեքսանդր Լուկաշենկոն հայտարարել է, որ մոտ ժամանակում նախատեսվում է հանդիպում Ռուսաստանի նախագահ Վլադիմիր Պուտինի հետ՝ երկկողմ օրակարգի մի շարք հարցեր քննարկելու նպատակով։ Այդ մասին հայտնում է ԲԵԼՏԱ գործակալությունը։

Լուկաշենկոյի խոսքով՝ ինքը և Ռուսաստանի նախագահը գրեթե ամեն օր կապի մեջ են գտնվում։ Նա նշել է, որ արդեն պայմանավորվածություն կա անձնական հանդիպման վերաբերյալ, որի ընթացքում կքննարկվեն այն խնդիրները, որոնք կարող են վերաբերել երկու երկրներին։

Բելառուսի ղեկավարը նաև նշել է, որ երկու երկրների միջև գործում է համագործակցության սկզբունք, ըստ որի՝ եթե կառավարությունների մակարդակով որևէ հարց լուծում չի ստանում, այն փոխանցվում է նախագահների անմիջական քննարկմանը։

Ավելի վաղ Լուկաշենկոն անդրադարձել էր նաև միջազգային զարգացումներին՝ հայտնելով կարծիք, որ Ուկրաինայի և Իրանի շուրջ հակամարտությունները կարող են ավարտվել արդեն 2026 թվականին։