Թմրամիջnցի шպօրինի շրջանառության դեպքեր են բացահայտվել

Թմրամիջnցի шպօրինի շրջանառության դեպքեր են բացահայտվել: Այս մասին տեղեկացնում են ՀՀ ՆԳՆ Ոստիկանությունից:

Համայնքային ոստիկանության Թալինի բաժնի ծառայողները ձեռնարկած օպերատիվ-հետախուզական միջոցառումների արդյունքում հունիսի 11-ին Արագածավան գյուղում հայտնաբերել, ձերբակալել և բաժին են տեղափոխել նույն գյուղի բնակիչ 33-ամյա մի երիտասարդի։ Նրա անձնական խուզարկությամբ հայտնաբերվել է մարիխուանա տեսակի թմրամիջոցի նմանվող զանգվածով կաթուցիչ՝ ընդհանուր 3,53 գրամ քաշով։ Բացատրական աշխատանքի արդյունքում երիտասարդը հայտնել է, որ հայտնաբերվածը թմրամիջոց է, պատրաստել է իր տնամերձ հողամասում աճեցրած կանեփից։ Նախաձեռնվել է քրեական վարույթ, որի շրջանակում կատարված զննությամբ Արագածավան գյուղի Հոկտեմբերյան խճուղում գտնվող տնամերձ հողամասում հայտնաբերվել է կանեփի 20 բույս։ 33-ամյա երիտասարդը տեղափոխվել է ձերբակալվածների պահման վայր։ Կատարվում է նախաքննություն։

Թմրանյութ ձեռք բերելու, պահելու և օգտագործելու դեպք է բացահայտվել նաև Համայնքային ոստիկանության Վաղարշապատի բաժնի ծառայողների ձեռնարկած միջոցառումների արդյունքում։

Օպերատիվ տեղեկությունը ստուգելու նպատակով համայնքային ոստիկանները հունիսի 11-ին այցելել են Արևաշատ գյուղի բնակիչ 52-ամյա տղամարդու բնակության հասցե։ Տան բակի ակնհայտ տեսանելի հատվածում ոստիկանները նկատել են կանեփի բույսեր։ Նախաձեռնվել է քրեական վարույթ, որի շրջանակում կատարված զննությամբ 52-ամյա տղամարդու տան բակում հայտնաբերվել է կանեփի 15 բույս։ Տղամարդը հայտնել է, որ կանեփն աճեցրել է անձնական օգտագործման համար թմրամիջոց պատրաստելու նպատակով։ Նախաքննությամբ հանգամանքները պարզվում են։

Նույն օրը թմրանյութ պահելու, օգտագործելու, ինչպես նաև սառը զենք պահելու և կրելու դեպք են բացահայտել Համայնքային ոստիկանության Քանաքեռ-Զեյթունի բաժնի ծառայողները։ Ձեռնարկած օպերատիվ-հետախուզական միջոցառումների արդյունքում ժամը 22․50-ի սահմաններում Ռուբինյանց փողոցի հասցեներից մեկի մոտ հայտնաբերվել, ձերբակալվել և բաժին են տեղափոխվել Երևանի բնակիչ՝ 45 և 43 տարեկան երկու տղամարդ։ 45-ամյա տղամարդու անձնական խուզարկությամբ հայտնաբերվել է բարդ փականով ծալովի դանակ, իսկ 43-ամյա տղամարդու անձնական խուզարկությամբ՝ մոխրացած հետքերով կաթուցիչ։
Կազմված փաստաթղթերը ներկայացվել են նախաքննական մարմին։