ԱՄՆ-ին՝ 74%, Հայաստանին՝ 26%․ Միրզոյանը ներկայացրեց ԹՐԻՓՓ-ի պայմանները

«Ողջ գործընթացը՝ թե՛ ընկերության ստեղծումը, թե՛ դրա հետագա գործունեությունը, ինչպես նաև այս համաձայնագրի իրականացումը, ամբողջությամբ համապատասխանում են Հայաստանի Հանրապետության ինքնիշխանության, իրավազորության և տարածքային ամբողջականության լիարժեք հարգման սկզբունքներին»,- կառավարության նիստում հայտարարեց ՀՀ արտաքին գործերի նախարար Արարատ Միրզոյանը՝ ներկայացնելով «Հայաստանի Հանրապետության և Ամերիկայի Միացյալ Նահանգների միջև «Թրամփի ուղի՝ հանուն միջազգային խաղաղության և բարգավաճման» նախագծի (ԹՐԻՓՓ) վերաբերյալ ռազմավարական համագործակցության մասին շրջանակային համաձայնագիրը վավերացնելու մասին» օրենքի նախագիծը։

Նրա խոսքով՝ Հայաստանը և ԱՄՆ-ը հիմնադրելու են ԹՐԻՓՓ ընկերությունը, որը Հայաստանի տարբեր տարածքներում կկարողանա ստեղծել դուստր կամ այլ նշանակության ընկերություններ, ներգրավել գործընկերների և ստանալ հողօգտագործման ու կառուցապատման իրավունքներ։ Նախատեսվում է, որ այդ իրավունքները կգործեն նախնական 49 տարի ժամկետով։

Միրզոյանի ներկայացմամբ՝ այդ ընթացքում ընկերության բաժնեմասերի 74 տոկոսը կպատկանի ԱՄՆ-ին, իսկ 26 տոկոսը՝ Հայաստանին։ 49-ամյա ժամկետի ավարտից հետո կողմերը հնարավորություն կունենան համագործակցությունը երկարաձգել ևս 50 տարով, ինչի արդյունքում Հայաստանի մասնաբաժինը կաճի՝ հասնելով 49 տոկոսի։

ԱԳ նախարարը շեշտեց, որ ճանապարհի անվտանգության ապահովումը, իրավապահ վերահսկողությունը, ինչպես նաև մաքսային, սահմանային և հարկային գործառույթները կմնան Հայաստանի Հանրապետության իրավասության ներքո։

Միրզոյանը անդրադարձավ նաև կառավարման «ֆրոնտ-օֆիս» և «բեք-օֆիս» մոդելին՝ նշելով, որ այն միջազգային ընդունված պրակտիկա է և նախկինում կիրառվել է նաև Հայաստանում։