Արգենտինայի հավաքականին ՖԻՖԱ-ի պատժամիջոցներ են սպառնում քաղաքական պաստառի պատճառով

Արգենտինայի ազգային հավաքականը կարող է ենթարկվել ՖԻՖԱ-ի կարգապահական պատժամիջոցների՝ աշխարհի առաջնության կիսաեզրափակչից հետո ցուցադրված քաղաքական բովանդակությամբ պաստառի պատճառով։ Այդ մասին հայտնում է The Athletic-ը։

Աշխարհի 2026 թվականի առաջնության կիսաեզրափակչում Անգլիայի նկատմամբ 2։1 հաշվով հաղթանակից հետո Արգենտինայի հավաքականի պաշտպան Լիսանդրո Մարտինեսը և կիսապաշտպան Ջովանի Լո Չելսոն խաղադաշտ են դուրս բերել «Մալվինյան կղզիները պատկանում են Արգենտինային» գրությամբ պաստառ։ Ֆուտբոլիստները այն ցուցադրել են հանդիպումից հետո՝ երկրպագուների հետ հաղթանակը տոնելու ընթացքում։

Հրապարակման համաձայն՝ նման գործողությունը հակասում է ՖԻՖԱ-ի կանոնակարգին, որը մրցաշարի մասնակիցներին արգելում է քաղաքական կամ կրոնական բնույթի հայտարարություններ անել կամ համապատասխան խորհրդանիշներ ցուցադրել։

Նշվում է նաև, որ Մեծ Բրիտանիայի վարչապետ Քիր Սթարմերի գրասենյակը աջակցել է տեղի ունեցածի վերաբերյալ հետաքննություն անցկացնելու կոչերին, իսկ Լոնդոնը դիմել է ՖԻՖԱ-ին՝ պահանջելով քննություն սկսել։

Մալվինյան կղզիները, որոնք Մեծ Բրիտանիայում հայտնի են որպես Ֆոլքլենդյան կղզիներ, Արգենտինայի և Միացյալ Թագավորության միջև տարածքային վեճի առարկա են 1982 թվականից։