Սև բերդի օտարման գործով հարուցվել է հանրային քրեական հետապնդում Սերժ Սարգսյանի նկատմամբ

ՀՀ քննչական կոմիտեն հայտնում է, որ ավարտվել է ՀՀ պաշտպանության նախկին նախարար Ս.Ս.-ի կողմից Գյումրի քաղաքի «Սև բերդ» ամրոցի օտարման դեպքի առթիվ նախաձեռնված քրեական վարույթի նախաքննությունը։

ՔԿ-ի հաղորդմամբ՝ նախաքննության ընթացքում ձեռք են բերվել տվյալներ այն մասին, որ Ս.Ս.-ն 2005 թվականի մայիսի 11-ին անշարժ գույքի առուվաճառքի պայմանագրով՝ ուղղակի վաճառքի միջոցով, 22 մլն 951 հազար 500 դրամով ֆիզիկական անձի է օտարել Գյումրի քաղաքի «Սև բերդ» ամրոցը և դրա օգտագործման համար նախատեսված 0,7 հա հողամասը։ Ըստ քննության տվյալների՝ օտարված գույքը հանդիսացել է հանրապետական նշանակության պատմության և մշակույթի անշարժ հուշարձան՝ 626,45 քմ մակերեսով։

Քննչական կոմիտեի տեղեկացմամբ՝ կատարված գործողությունների հետևանքով էական վնաս է պատճառվել պետության օրինական շահերին, ինչի արդյունքում պետությունը կորցրել է պատմամշակութային արժեքի նկատմամբ սեփականության իրավունքը։ Նախաքննության ընթացքում հսկող դատախազի որոշմամբ Ս.Ս.-ի նկատմամբ հարուցվել է հանրային քրեական հետապնդում՝ պաշտոնատար անձի կողմից իշխանական կամ ծառայողական լիազորությունները չարաշահելու կամ անցնելու հոդվածով, որն անզգուշությամբ առաջացրել է ծանր հետևանքներ։

Քրեական վարույթի նախաքննությունն ավարտվել է, և գործն ուղարկվել է հսկող դատախազին՝ մեղադրական եզրակացությամբ։