Վահագն Սարոյան․ Հայաստանում ապօրինի զենքի շրջանառությունը հանրային անվտանգության լուրջ խնդիր է

Ռազմական փորձագետ Վահագն Սարոյանը անդրադարձել է Հայաստանում, մասնավորապես՝ Երևանում, հրազենի գործադրմամբ հանցագործությունների հաճախացմանը՝ նշելով, որ խնդիրը վերածվել է հանրային անվտանգության լուրջ մարտահրավերի։

Նա ընդգծել է, որ խնդիրը միայն առանձին կրակոցների դեպքերը չեն, այլ նաև հասարակության շրջանում ապօրինի պահվող և չգրանցված զենք-զինամթերքի շրջանառությունը։

Սարոյանի խոսքով՝ իշխանությունները պետք է հստակ պատասխանեն, թե ինչ ծավալի ապօրինի զենք կա երկրում, ինչպես է այն հայտնվում քաղաքացիների ձեռքում և ինչ միջոցներով է վերահսկվում դրա շրջանառությունը։

Փորձագետը նշել է, որ հրազենային միջադեպերի հաճախականությունը պահանջում է ոչ միայն դեպքերից հետո արձագանք, այլև անվտանգության համակարգի արդյունավետության վերաբերյալ համապարփակ գնահատում։