Daily Express․ Զելենսկին նոր կոչ է արել ԱՄՆ-ին և Եվրոպային՝ ուժեղացնել Ուկրաինայի ՀՕՊ-ը

Ուկրաինայի նախագահ Վլադիմիր Զելենսկին Կիևի վրա իրականացված լայնածավալ հարձակման ֆոնին ԱՄՆ-ին և եվրոպական երկրներին կոչ է արել ավելացնել հակաօդային պաշտպանության համակարգերի համար նախատեսված հրթիռների մատակարարումները։ Այս մասին գրում է Daily Express պարբերականը։

Պարբերականի գնահատմամբ՝ մայրաքաղաքի վրա հարձակման ընթացքում Զելենսկին դիմել է արևմտյան դաշնակիցներին՝ կոչ անելով մեծացնել ռազմական աջակցությունը։ Daily Express-ը նաև հիշեցնում է, որ ԱՄՆ նախագահ Դոնալդ Թրամփը հայտարարել էր Ուկրաինային Patriot զենիթահրթիռային համալիրների արտադրության լիցենզիա տրամադրելու հնարավորության մասին, սակայն այդ նախաձեռնության իրականացման հեռանկարները դեռևս անորոշ են։

Ավելի վաղ ԱՄՆ նախագահ Դոնալդ Թրամփի նախկին խորհրդական Սթիվ Կորտեսը հայտարարել էր, որ Ուկրաինան պետք է խաղաղության հասնի բանակցությունների միջոցով՝ պնդելով, որ դա կարող է հանգեցնել Վլադիմիր Զելենսկու իշխանության կորստին։ Նրա խոսքով՝ Ուկրաինայի ներսում դժգոհությունն աճում է։