Լոռիում բացահայտվել են թմրամիջոցների ապօրինի պահման և բույսերի աճեցման դեպքեր

Համայնքային ոստիկանության Թումանյանի բաժնի ծառայողները բացահայտել են կանեփ և կակաչ աճեցնելու, ինչպես նաև թմրամիջոցներ ապօրինի պահելու և օգտագործելու դեպքեր։

ՆԳՆ-ից հայտնում են, որ օպերատիվ-հետախուզական միջոցառումների արդյունքում ոստիկանները տեղեկություն էին ստացել Սանահին կայարանի 66-ամյա բնակչի կողմից թմրամիջոց պահելու և կանեփ աճեցնելու վերաբերյալ։

Քրեական վարույթի շրջանակում կատարված խուզարկությամբ նրա բնակության վայրում հայտնաբերվել է շուրջ 250 գրամ դեղնականաչավուն զանգված, իսկ բակում՝ մշակված կանեփի 53 թուփ։

Մեկ այլ դեպքով ոստիկանները մեկնել են Աքորի գյուղ, որտեղ 74-ամյա տղամարդու բնակության վայրում հայտնաբերվել են դեղնականաչավուն զանգված, ափիոնի նմանվող 30 գնդիկ, 442 գրամ քաշով խաշխաշի գլխիկներ, խաշխաշի ծղոտ, կակաչի սերմեր և 359 թուփ կակաչ։

Երկու դեպքով էլ բնակիչները հայտնել են, որ հայտնաբերված նյութերը նախատեսված են եղել անձնական օգտագործման համար։ Դեպքերի հանգամանքները պարզվում են։