ԿԸՀ նիստից րոպեներ առաջ. Ղազինյանի գործը շտապ հասցրին դատարան. Վարդեւանյան

«Ուժեղ Հայաստան» կուսակցության խորհրդի անդամ Դավիթ Ղազինյանի նկատմամբ հարուցված քրեական գործը ԿԸՀ նիստից անմիջապես առաջ աննախադեպ արագությամբ ուղարկվել է դատարան։ Այս մասին հայտարարեց նրա կուսակից, փաստաբան Արամ Վարդևանյանը՝ քննադատելով իրավապահ մարմինների գործողությունները։

Վարդևանյանի խոսքով՝ Դավիթ Ղազինյանը դեռևս մինչև ԿԸՀ որոշման ընդունումը կամովին ներկայացել էր Քննչական կոմիտե, ուստի քննությանը խոչընդոտելու որևէ ռիսկ գոյություն չուներ։

«Արել են ամեն ինչ, որպեսզի մինչև այս նիստը գործն ուղարկվի դատարան։ Նախաքննության ավարտն ինքնին նշանակում է, որ խոչընդոտելու կամ ազդեցություն գործադրելու ռիսկերը նվազում են։ Մենք միջնորդել էինք իրականացնել Դավիթ Ղազինյանի հարցաքննություն և առերեսում, սակայն այդ գործողությունները չեն կատարվել»,- ասաց նա։

Փաստաբանի գնահատմամբ՝ գործընթացի նման արագացումը նպատակ ունի իրավական իրավիճակ ստեղծել, որի դեպքում ԿԸՀ նիստից հետո կարող են հղում անել այն հանգամանքին, որ գործն արդեն դատարանում է և նախաքննական մարմինն այլևս լիազորություններ չունի։

«Եթե նիստն ավարտվի և մենք ունենանք արձանագրություն, որ Դավիթ Ղազինյանը պատգամավոր է, ապա կարող են հայտարարել, թե այլևս իրավասություն չունեն որևէ որոշում կայացնելու, քանի որ գործը դատարանում է։ Սա աբսուրդի նոր նշաձող է»,- նշել է Վարդևանյանը։

Նրա խոսքով՝ օրվա ընթացքում սպասվում են նաև նոր զարգացումներ, որոնց վերաբերյալ ավելի մանրամասն կխոսի ժամը 17։00-ին։