Bloomberg․ ԱՄՆ-ին մինչև 2035 թվականը կարող է սպառնալ էլեկտրաէներգիայի դեֆիցիտ

Արհեստական բանականության արագ զարգացման և տվյալների մշակման կենտրոնների (Data Center) թվի աճի պատճառով ԱՄՆ-ը մինչև 2035 թվականը կարող է բախվել շուրջ 19 գիգավատտ էլեկտրաէներգիայի դեֆիցիտի։ Այս մասին հայտնում է Bloomberg-ը։

Պարբերականի տվյալներով՝ մինչև 2035 թվականը տվյալների մշակման կենտրոնների էլեկտրաէներգիայի պահանջարկը կհասնի 194 գիգավատտի, ինչը 83 տոկոսով գերազանցում է անցյալ տարվա դեկտեմբերին ներկայացված կանխատեսումը։ Սպասվում է, որ այդ ժամանակ նման կենտրոնները կսպառեն ԱՄՆ-ում արտադրվող ամբողջ էլեկտրաէներգիայի մոտ 20 տոկոսը, մինչդեռ ներկայում այդ ցուցանիշը կազմում է 5,9 տոկոս։ Պահանջարկի կտրուկ աճը պայմանավորված է արհեստական բանականության համակարգերի սպասարկման համար նախատեսված նոր տվյալների կենտրոնների կառուցմամբ։

Bloomberg-ի զրուցակից, վերլուծաբան Լլոյդ Առնոլդի խոսքով՝ ԱՄՆ-ի էներգահամակարգն արդեն այսօր դժվարությամբ է դիմանում աճող ծանրաբեռնվածությանը։ Միաժամանակ McKinsey ընկերությունը կանխատեսում է, որ արհեստական բանականության լայն տարածման հետևանքով մինչև 2030 թվականը Եվրոպայում տվյալների կենտրոնների էլեկտրաէներգիայի սպառումը կեռապատկվի՝ հասնելով տարեկան 150 տերավատտ-ժամի։