Գագիկ Ծառուկյանի նկատմամբ նոր հանրային քրեական հետապնդում է հարուցվել

ԲՀԿ առաջնորդ Գագիկ Ծառուկյանի նկատմամբ նոր հանրային քրեական հետապնդում է հարուցվել հարկերից խուսափելու հոդվածով։ Ավելի քան 12 ժամ տեւած հարցաքննությունից հետո լրագրողներին ասաց Ծառուկյանի պաշտպաններից Էմին Խաչատրյանը։

Փաստաբանն այս վարույթը զավեշտ որակեց՝ հիշեցնելով, որ Ծառուկյանը դեռեւս 2003թ.–ից, երբ ընտրվել է ԱԺ պատգամավոր, իր բոլոր բիզնեսները հանձնել է կառավարման։

«Պարոն Ծառուկյանն իր բիզնեսների կառավարման հետ որևէ առնչություն չէր կարող ունենալ առհասարակ։ Նոր քրեական հետապնդումը կապված է կոնյակի գործարանի հետ։ Սա քաղաքական հետապնդում է, քաղաքական ճնշումներ են»,– ասել է պաշտպանը։

Անդրադառնալով այսօրվա առերեսմանը՝ Էմին Խաչատրյանը նշել է, որ իրանցի եղբայրների՝ ավելի վաղ հայտնած ցուցմունքների եւ այսօրվա ասածի մեջ կար հակասություն։

Ընտրություններից հետո կալանավորված Ծառուկյանը մեղադրվում է առանձնապես խոշոր չափերով խարդախություն կատարելու և փողերի լվացման մեջ։ Իրավապահ մարմինների տվյալներով՝ նա կազմակերպել է իրանցի գործարարների՝ ավելի քան 21 միլիոն դոլար արժողությամբ գույքի հափշտակություն։ Մինչդեռ Ծառուկյանի փաստաբանները պնդում են, որ իրանցիներն են պարտք «Բարգավաճ Հայաստան» կուսակցության առաջնորդին, և դրա վերաբերյալ կան հաստատող պարտամուրհակներ։

Ծառուկյանի պաշտպանությունը պնդում է, որ Իրանում նույն անձինք նույն գործով դատապարտվել են և պարտավոր են Ծառուկյանին վճարել խոշոր գումար։