ԱՄՆ-ը մշակում է ԴՆԹ թեստ՝ կենսաբանական զենքը դաշտային պայմաններում նույնականացնելու համար

ԱՄՆ ՌԾՈւ ռազմածովային հետազոտությունների լաբորատորիան (NRL) գործընկերների հետ համատեղ մշակել է դաշտային պայմաններում ԴՆԹ վերլուծության միջոցով կենսաբանական սպառնալիքները հայտնաբերելու շարժական համակարգ՝ FFBS։

Դրա հիմքում ավելի քան տասնամյա աշխատանքն է F-FAST ծրագրի շրջանակում։ Ի տարբերություն քիմիական և ճառագայթաբանական զենքի՝ կենսաբանական զենքի համար գոյություն չունի նույնքան պարզ դաշտային «համարժեք»՝ ռեագենտների, սենսորների կամ Գեյգերի հաշվիչի նման։ Ավելի վաղ նման վերլուծություններ իրականացնելու համար պահանջվում էին լիարժեք լաբորատորիա՝ թանկարժեք սարքավորումներով, որակավորված մասնագետներ և անվտանգության միջոցների պահպանման խիստ վերահսկողություն։

Մշակողների խնդիրն էր հետազոտությունների արդյունքները «փաթեթավորել» կոմպակտ ալգորիթմի մեջ, որը կկարողանա օգտագործել ռազմական միկրոկենսաբանը կամ սանիտարը՝ առանց հիմնարար պատրաստվածության մոլեկուլյար կենսաբանության ոլորտում։

FFBS-ը կարող է վերլուծել ԴՆԹ և ՌՆԹ, քանի որ տարբեր պաթոգեններ գենետիկական տեղեկատվությունը տարբեր կերպ են պահպանում, հետազոտության արդյունքները տրամադրել կես ժամից էլ քիչ ժամանակում, չսահմանափակվել միայն որոնմամբ նախապես տրված պաթոգենների ցանկով, մասնավորապես՝ լրացուցիչ հայտնաբերել նախկինում անհայտ օրգանիզմներ, արագ և ճշգրիտ որոշել շտամը, ինչպես նաև արձանագրել դրա գենետիկական մոդիֆիկացիայի նշանները։

Ամբողջ հավաքածուն նախատեսված է դաշտային պայմաններում օգտագործման համար․ սարքավորումները փոքրացվել են և պաշտպանված են արտաքին ազդեցություններից։

Նոր տեխնոլոգիան մարտի դաշտում ստորաբաժանումների հրամանատարներին տրամադրելու է կրիտիկականորեն կարևոր տեղեկատվություն կենսաբանական զենքի կիրառման նույնիսկ ամենափոքր կասկածի դեպքում։

Այս պահի դրությամբ տեխնոլոգիան արդեն փորձարկվել է ռազմական զորավարժությունների ընթացքում տարբեր կլիմայական պայմաններում՝ անապատում, Արկտիկայում և ռազմածովային ուժերի նավերում։