«Սա մարդու իրավունքների խախտում է»․ ԲՀԿ-ն նամակ է հանձնել Իրանի դեսպանին

«Այս պահին գտնվում ենք Իրանի Իսլամական Հանրապետության դեսպանատան առջև։ «Բարգավաճ Հայաստան» կուսակցության ներկայացուցիչների այցն այստեղ ունի ինչպես գործնական, այնպես էլ խորհրդանշական նշանակություն»,- հայտարարել է ԲՀԿ մամուլի խոսնակ Իվետա Տոնոյանը։

Նրա խոսքով՝ ուրբաթ օրը ԲՀԿ քաղաքական խորհրդի և կուսակցության անունից նամակներ են ուղարկվել Հայաստանում հավատարմագրված բոլոր դիվանագիտական ներկայացուցիչներին, ինչպես նաև միջազգային կազմակերպություններին՝ նրանց ուշադրությունը հրավիրելով ԲՀԿ նախագահ Գագիկ Ծառուկյանի նկատմամբ իրականացվող գործընթացների վրա։

«Դիվանագիտական ներկայացուցիչներին տեղեկացրել ենք, որ, մեր գնահատմամբ, տեղի են ունենում մարդու իրավունքների և ժողովրդավարական սկզբունքների կոպիտ խախտումներ։ Կարծում ենք, որ միջազգային կառույցներն ու Հայաստանում գործող դիվանագետները պետք է այս հարցը պահեն իրենց մշտական ուշադրության կենտրոնում և համապատասխան գնահատական տան կատարվողին։

Այսօր ԻԻՀ դեսպանատան մոտ ենք, որպեսզի նորին գերազանցություն, դեսպան Մեհդի Սոբհանիին անձամբ փոխանցենք «Բարգավաճ Հայաստան» կուսակցության նամակը, որտեղ ներկայացված են Գագիկ Ծառուկյանի նկատմամբ իրականացվող գործողությունների վերաբերյալ մեր դիրքորոշումն ու գնահատականները։

Մեզ համար անընդունելի է, որ Իրանի երկու քաղաքացիների հետ կապված այս պատմության հետևանքով կարող են վնասվել հայ-իրանական դարավոր բարեկամական հարաբերությունները»,- նշել է Տոնոյանը։