Զելենսկին հայտարարել է, որ Ռուսաստանը ցանկանում է ներգրավել ևս 30 հազար հյուսիսկորեացի զինծառայողի

Ուկրաինայի նախագահ Վոլոդիմիր Զելենսկին հայտարարել է, որ Ռուսաստանը նախատեսում է Ուկրաինայի դեմ պատերազմում ներգրավել ևս շուրջ 30 հազար հյուսիսկորեացի զինծառայողի։ Նրա խոսքով՝ Ռուսաստանն արդեն նախապատրաստվում է նրանց ընդունել Վորոնեժի մարզում։ Այս մասին նա հայտարարել է իր ամենօրյա տեսաուղերձում։

Զելենսկու պնդմամբ՝ Հյուսիսային Կորեան նաև պատրաստվում է Ռուսաստանին մատակարարել նոր բալիստիկ հրթիռային կայանքներ։ Նա նշել է, որ Մոսկվայի և Փհենյանի ռազմական համագործակցությունը վտանգ է ներկայացնում ոչ միայն Ուկրաինայի, այլև Ասիայի այն երկրների համար, որոնք գտնվում են հյուսիսկորեական հրթիռների հասանելիության գոտում։

Նշվում է, որ 2024 թվականին փոխադարձ պաշտպանության մասին համաձայնագրի շրջանակում Հյուսիսային Կորեան արդեն ուղարկել էր շուրջ 14 հազար զինծառայող Ռուսաստանի Կուրսկի մարզ՝ աջակցելու ռուսական ուժերին։ Զելենսկին նաև հայտարարել է, որ Ուկրաինան պատասխան քայլեր կձեռնարկի այս սպառնալիքին։ Reuters-ը նշում է, որ չի կարողացել անկախ կերպով հաստատել այս հայտարարությունները։