Քննությամբ պարզվել է՝ «հանկարծամահություն» ներկայացված դեպքը սպանություն է․ կասկածյալը կալանավորվել է

2026 թվականի հուլիսի 22-ին շտապօգնության ահազանգով Երևան քաղաքի Սիսակյան փողոցի շենքերից մեկում արձանագրվել էր Ն.Ռ.-ի մահը։

ՀՀ քննչական կոմիտեն հայտնում է, որ իրականացված քննչական գործողությունների և ոստիկանության օպերատիվ միջոցառումների արդյունքում պարզվել է՝ դեպքը ոչ թե հանկարծամահություն, այլ սպանություն է։

Քննությամբ պարզվել է, որ գումարային հարցերի շուրջ առաջացած վիճաբանության ընթացքում տղամարդը հարվածներ է հասցրել տուժողին՝ պատճառելով մահացու վնասվածքներ, ապա զանգահարել է շտապօգնություն և հայտնել, թե իբր վերջինս ուշագնաց է եղել։

Դատաբժշկական նախնական տվյալների համաձայն՝ մահը վրա է հասել գլխի, պարանոցի և կրծքավանդակի փակ, բութ վնասվածքների հետևանքով զարգացած շոկից։

Դեպքի առթիվ հարուցվել է հանրային քրեական հետապնդում՝ Քրեական օրենսգրքի 155-րդ հոդվածի 1-ին մասով։ Կասկածյալի նկատմամբ որպես խափանման միջոց ընտրվել է կալանավորումը։