Ավարտվել է 6 մարդու մահվան ելքով Գյումրի-Արմավիր ճանապարհի վթարի գործի նախաքննությունը

ՀՀ քննչական կոմիտեն հայտնում է, որ ավարտվել է 2026 թվականի ապրիլի 10-ին Գյումրի-Արմավիր ավտոճանապարհին տեղի ունեցած՝ 6 անձի մահվան պատճառ դարձած ՃՏՊ-ի դեպքով նախաձեռնված քրեական վարույթի նախաքննությունը։

Քննությամբ ձեռք բերված տվյալների համաձայն՝ վարորդը կորցրել է ավտոմեքենայի կառավարումը, դուրս եկել հանդիպակաց երթևեկելի գոտի և բախվել մեկ այլ մեքենայի, ինչի հետևանքով մահացել է 6 անձ։

Վարորդ Կ․Ա․-ի նկատմամբ հարուցվել է հանրային քրեական հետապնդում՝ Քրեական օրենսգրքի 342-րդ հոդվածի 3-րդ մասով՝ ճանապարհային երթևեկության անվտանգության կանոնները խախտելու համար։

Նրա նկատմամբ որպես խափանման միջոց ընտրվել է կալանավորումը։ Քրեական վարույթը մեղադրական եզրակացությամբ ուղարկվել է հսկող դատախազին։