Փորձագետը բացատրել է՝ ինչ է տեղի ունենում օրգանիզմում կալորիաների երկարատև պակասի դեպքում

Կալորիաների երկարատև սահմանափակման դեպքում օրգանիզմը սկսում է խնայել իր ռեսուրսները՝ նվազեցնելով էներգիայի ծախսը և ֆիզիկական ակտիվությունը։ Այս մասին NEWS.ru-ին հայտնել է սննդաբան և ակտիվ երկարակեցության մասնագետ Ելենա Ժելյանինան, փոխանցում է ՌԻԱ Նովոստին։

Մասնագետի խոսքով՝ երբ մարդը երկար ժամանակ քիչ կալորիաներ է ստանում, օրգանիզմը նվազեցնում է հանգստի ժամանակ էներգիայի ծախսը, իսկ ուժերի պակասի պատճառով մարդն ակամա ավելի քիչ է շարժվում։ Միաժամանակ փոխվում է ախորժակի և հագեցվածության զգացումը կարգավորող հորմոնների աշխատանքը։ Ժելյանինան ընդգծել է, որ սա օրգանիզմի բնական պաշտպանական մեխանիզմ է։

Նրա խոսքով՝ սննդակարգի ընթացքում քաշի նվազման դադարն ավելի հաճախ կապված է ոչ թե հորմոնային խանգարման, այլ նյութափոխանակության հարմարվողականության հետ։ Եթե քաշը մի քանի ամիս չի նվազում, պատճառների թվում կարող են լինել կալորիաների սխալ հաշվարկը, սպիտակուցի պակասը, մկանային զանգվածի նվազումը, ուժային մարզումների բացակայությունը, քրոնիկ սթրեսը կամ անբավարար քունը։