ԱՄՆ հետախուզական ինքնաթիռը շուրջ հինգ ժամ թռիչքներ է իրականացրել Ռուսաստանի սահմանների մոտ

ԱՄՆ ռազմաօդային ուժերի կողմից օգտագործվող Bombardier ARTEMIS II հետախուզական ինքնաթիռը շուրջ հինգ ժամ պարեկային թռիչքներ է իրականացրել Ռուսաստանի Կալինինգրադի մարզի մերձակայքում։ Այս մասին, թռիչքային տվյալների ուսումնասիրության հիման վրա, հայտնում է ՌԻԱ Նովոստին։

Ինքնաթիռը Մոսկվայի ժամանակով մոտ ժամը 09:00-ին օդ է բարձրացել Ռումինիայի Կոնստանցա քաղաքի օդանավակայանից և ժամը 10:50-ի սահմաններում հասել Կալինինգրադի մարզի մերձակայք։ Այն թռիչքներ է իրականացրել Լեհաստանի և Լիտվայի օդային տարածքներում՝ Ռուսաստանի սահմանին չմոտենալով 50 կիլոմետրից ավելի։ Ժամը 15:40-ի սահմաններում ինքնաթիռը վերադարձի ուղեգիծ է վերցրել։

Միաժամանակ Կալինինգրադի մարզի սահմանից մոտ 100 կիլոմետր հեռավորության վրա ավելի քան երկու ժամ գտնվել է ԱՄՆ ՌՕՈւ ևս մեկ ինքնաթիռ՝ Gulfstream EA-37B Compass Call II ռադիոէլեկտրոնային պայքարի օդանավը։ Մոսկվան վերջին տարիներին բազմիցս մտահոգություն է հայտնել Ռուսաստանի արևմտյան սահմանների մոտ ՆԱՏՕ-ի ռազմական ակտիվության աճի կապակցությամբ։