Փաշինյանի մոտ բնածին վախերի հերթական սրացումն է, իսկ դատաիրավական համակարգը սպասարկում է նրա ֆոբիաները․ Ռոբերտ Քոչարյան

ՀՀ երկրորդ նախագահ Ռոբերտ Քոչարյանը ներկայացրել է մի շարք դիտարկումներ՝ անդրադառնալով Նիկոլ Փաշինյանի իշխանության գործողություններին և իր դեմ հարուցված քրեական հետապնդմանը։

Քոչարյանի խոսքով՝ Փաշինյանի մոտ դրսևորվում է «բնածին վախերի և բարդույթների հերթական մանիակալ սրացումը», իսկ դատաիրավական համակարգը, նրա գնահատմամբ, սպասարկում է վարչապետի ֆոբիաները։ Նա նշել է, որ ստեղծված իրավիճակում Հայաստանը կարող է կորցնել երկիրը, իսկ հասարակությունը, իր կարծիքով, կորցրել է «կոլեկտիվ ինքնապահպանման բնազդը»։

Անդրադառնալով իր դեմ ներկայացված քրեական մեղադրանքներին՝ Քոչարյանը դրանք որակել է «աբսուրդային» և պնդել, որ նման մեղադրանք ներկայացնելու համար անհրաժեշտ է կա՛մ «լիակատար բարոյական դեգրադացիա», կա՛մ «իրավական դեբիլիզմ», կա՛մ Ադրբեջանի դատաիրավական համակարգին լիակատար ենթարկում։ Նրա խոսքով՝ իշխանությունների մոտեցումն այն է, որ Արցախի բոլոր նախագահները պետք է հայտնվեն բանտում։

Քոչարյանը նաև հայտարարել է, որ երկիրը ներքաշվել է «ծայրահեղ վտանգավոր արկածախնդրության» մեջ՝ հայտնվելով խոշոր տերությունների աշխարհաքաղաքական շահերի բախման կենտրոնում։

Նրա գնահատմամբ՝ իշխանության նպատակն է հասարակության պառակտումը և վախի, ատելության, անկարողության ու դատապարտվածության մթնոլորտի ձևավորումը։ Քոչարյանը պնդել է, որ այդ պայմանները անհրաժեշտ են «Բաքվի բոլոր պահանջները կատարելու համար»։

«Փաշինյանը ոչ միայն հանձնում է հայկական հողերը, այլև կոտրում է ազգի կոլեկտիվ կամքն ու հոգևոր արժեքները, որոնք ցանկացած պետականության հիմքն են կազմում։ Սրան պետք է վերջ դնել, կամ էլ բոլորը պետք սկսեն թուրքերեն սովորել»,- ասել է ՀՀ երկրորդ նախագահը։