Արագածոտնում պարեկները կանխել են քաղաքացու առևանգումն ու հնարավոր սպանությունը․ կասկածյալներից մեկը փախել է

Օգոստոսի 27-ին Արագածոտնի մարզում պարեկները կանխել են քաղաքացու առևանգումը և նրա նկատմամբ հնարավոր հաշվեհարդարը․ հայտնում է Շամշյանը։

Ժամը 23:40-ի սահմաններում Ապարանում պարեկները Աշտարակ-Ապարան ավտոճանապարհին նկատել են անկանոն երթևեկող «ՎԱԶ 2107» ավտոմեքենա։ Այն կանգնեցնելուց հետո վարորդը փորձել է դիմել փախուստի, սակայն պարեկը կարողացել է կանխել դա։

Ավտոմեքենայում հայտնաբերվել են չորս անձինք, որոնց, ըստ նախնական տեղեկությունների, առևանգված քաղաքացու նկատմամբ հաշվեհարդար տեսնելու նպատակով տեղափոխել էին նրան Աշտարակի Մուղնի թաղամասից։ Պարեկների գործողությունների շնորհիվ նրանց մտադրությունը չի հաջողվել իրականացնել։

Ըստ տեղեկությունների՝ միջադեպի պատճառը գումարային պարտքի հետ կապված վեճն է եղել։ Ավտոմեքենայում գտնվող ևս մեկ անձի հաջողվել է դիմել փախուստի։ Նրա ինքնությունը պարզելու և հայտնաբերելու ուղղությամբ միջոցառումներ են իրականացվում։

Դեպքի առթիվ նյութեր են կազմվել մարդու առևանգման հատկանիշներով և փոխանցվել Քննչական կոմիտեի Արագածոտնի մարզային քննչական վարչություն։