ԱՄՆ պաշտոնյաները COSCO-ին մեղադրել են Պեկինի համար հետախուզական տվյալներ հավաքելու մեջ

Չինական պետական COSCO բեռնափոխադրող ընկերությունն իր նավերում տեղադրված գաղտնի սարքավորումների միջոցով հետախուզական տվյալներ է հավաքում Պեկինի համար, պնդել են Թրամփի վարչակազմի երկու բարձրաստիճան պաշտոնյաներ։ Այս մասին հայտնում է Reuters-ը։

ԱՄՆ պաշտոնյաների պնդմամբ՝ COSCO-ի նավերում տեղադրված հատուկ սարքավորումները հնարավորություն են տալիս որսալ ռազմական հաղորդակցության ազդանշաններ ԱՄՆ-ի և այլ երկրների ափերի մոտ, ինչպես նաև հետևել նավերի ու օդանավերի գործունեությանը Եվրոպայում, Հյուսիսային Ամերիկայում և Ասիայում։ Ըստ նրանց՝ հավաքվող տեղեկությունները կարող են վերաբերել ռազմական կապի տեխնոլոգիաներին, գաղտնագրման համակարգերին և ռազմավարական ծովային երթուղիներին։

Չինաստանի դեսպանատունը Վաշինգտոնում կտրականապես հերքել է ամերիկյան կողմի պնդումները՝ դրանք անվանելով անհիմն։ Դեսպանատան ներկայացուցիչը հայտարարել է, որ Չինաստանի կառավարությունը ընկերություններից կամ անհատներից չի պահանջում արտերկրում տվյալներ կամ հետախուզական տեղեկություններ հավաքել՝ խախտելով տվյալ երկրների օրենսդրությունը։

2025 թվականի հունվարին Պենտագոնը COSCO-ն ներառել էր Չինաստանի զինված ուժերի հետ կապեր ունեցող ընկերությունների ցանկում։ Reuters-ը նշում է, որ ընկերությունը շարունակում է մնալ համաշխարհային խոշորագույն բեռնափոխադրողներից մեկը և զգալի դեր ունի նաև ԱՄՆ-ի ծովային առևտրում։