Հայաստանն ու Ռուսաստանը պայմանավորվել են նոր ձևաչափով շարունակել երկխոսությունը, Պուտին

Ռուսաստանն ու Հայաստանը պայմանավորվել են առաջիկայում երկկողմ երկխոսությունը շարունակել հանգիստ և կառուցողական մթնոլորտում։ Այս մասին հայտարարել է ՌԴ նախագահ Վլադիմիր Պուտինը՝ պատասխանելով լրագրողների հարցերին։

«Թող անկեղծորեն ասեն, թե ինչ են ցանկանում և որոնք են իրենց նպատակները։ Մենք պայմանավորվել ենք երկխոսությունն անցկացնել հանգիստ ռեժիմով։ Նիկոլ Վովաևիչն առաջարկել է մեր համատեղ աշխատանքի մանրամասն վերլուծություն կատարել յուրաքանչյուր ուղղությամբ, և ես համաձայն եմ այդ մոտեցման հետ»,- նշել է Պուտինը։

Նրա խոսքով՝ Հայաստանի վարչապետ Նիկոլ Փաշինյանին հրավիրել է Մոսկվա՝ երկկողմ համագործակցության կոնկրետ հարցերը քննարկելու նպատակով։

«Ես նրան հրավիրել եմ Մոսկվա, որպեսզի առանց շտապելու, թե՛ նրա, թե՛ մեր մասնագետների մասնակցությամբ, մանրամասն քննարկենք բոլոր հարցերը։ Կան շատ կոնկրետ թեմաներ, օրինակ՝ երկաթուղու և դրա զարգացման հետ կապված հարցերը։ Նման ենթակառուցվածքային նախագծերում ներդրումները կախված են փոխադրումների ծավալներից։ Եթե փոխադրումների բավարար ծավալներ լինեն, կլինեն նաև ներդրումներ։ Եթե դրանք չլինեն, ապա ներդրումներ և զարգացում նույնպես չեն լինի»,- ասել է ՌԴ նախագահը։