Թուրքիայի Դիարբեքիր քաղաքում վերաբացվեց ավելի քան երեսուն տարի չգործող Ս. Սարգիս-Կիրակոս հայկական եկեղեցին

Հոկտեմբերի 22-ին Թուրքիայի Դիարբեքիր քաղաքում վերաբացվեց Ս. Սարգիս-Կիրակոս հայկական եկեղեցին: Եկեղեցու բացումը կատարեց Պոլսո հայոց պատրիարքական փոխանորդ Արամ արքեպիսկոպոս Աթեշյանը:

Վերաօծման արարողությանը ներկա գտնվելու համար Դիարբեքիր էր ժամանել ավելի քան երկու հազար մարդ տարբեր երկրներից: Կային խմբեր Հայաստանից, Սիրիայից, Լիբանանից, ԱՄՆ-ից եւ այլն: Հյուրեր էին ժամանել նաեւ Թուրքիայի տարբեր քաղաքներից, այդ թվում բազմաթիվ թուրք մտավորականներ, հասարակական գործիչներ, լրագրողներ: Արարողությանը ներկա էր նաեւ «Անադոլու» մշակութային միության նախագահ Օսման Կավալանը:

Ս.Էջմիածնի որեւէ ներկայացուցիչ վերաօծման արարողությանը ներկա չէր:

Հայաստանից ժամանած խմբերի թվում էին ՀՀ ԱԺ պատգամավորներ Արագած Ախոյանը (ԲՀԿ) եւ «Ժառանգություն» կուսակցության առաջնորդ Րաֆֆի Հովհաննիսյանը, «Երկիր Մեդիա», «Կենտրոն» հեռուստաընկերությունների, «Նոյյան տապան» լրատվական կենտրոնի լրագրողներ, «Ակունք» ազգագրական համույթի անդամները եւ շատ ուրիշներ:

Օրերս թուրք-քրդական ընդհարումների ժամանակ ավելի քան երկու տասնյակ թուրք զինվորականների զոհվելու հետեւանքով Թուրքիայում հայտարարված սուգը որոշ սրբագրումներ մտցրեց հայկական եկեղեցու վերաբացման ծրագրի մեջ: Նախատեսված երաժշտական ելույթները տեղի չունեցան:

Դիարբեքիրի տարբեր մասերում Ս. Սարգիս-Կիրակոս հայկական եկեղեցու վերաբացման արարողության առիթով քաղաքապետարանի կողմից փակցված էին մեծ պաստառներ, որոնց վրա տարբեր լեզուներով գրված էր "Բարի եկաք Ձեր տունը":

Հիշեցնենք, որ Ս. Կիրակոսը այդ տարածաշրջանի խոշորագույն հայկական եկեղեցին է, որը տանիքի փլուզման հետեւանքով չէր գործում ավելի քան երեսուն տարի: Եկեղեցու հատակը 1300 քառ. մետր է, այն տեղակայված է 3 հազար քառ. մետր ընդհանուր տարածք ունեցող համալիրում, որն ունի նաեւ վանատուն, մատուռ, դահլիճ, ճաշարան եւ դպրոցի մեկ շենք: Առայժմ վերականգնման է ենթարկվել եկեղեցու շենքը: Համալիրին կից կառույցների վերանորոգումը նախատեսվում է հետագայում: