Ցանկանում եք անդամակցել մաֆիայի՞ն։ Գնացեք ձեր մաֆիան ուրիշ երկրներում հիմնեք։ Սակայն դա ձեր երկրում մի արեք, ձեր ժողովրդի դեմ մի արեք

Աշխարհահռչակ շանսոնյե, Շվեյցարիայում Հայաստանի դեսպան Շառլ Ազնավուրը բացառիկ հարցազրույց է տվել Nouvelles d'Arménie ամսագրին, խոսել է Հայոց ցեղասպանության, հայ-թուրքական հարաբերությունների, ղարաբաղյան հիմնախնդրի և Հայաստանի առջև ծառացած լուրջ խնդիրների մասին: Հայաստանում առկա խնդիրներից Ազնավուրը մասնավորապես առանձնացրել է արտագաղթը։

Պատասխանելով Nouvelles d'Arménie ամսագրի այն հարցին, թե «Ո՞րն է Հայաստանից արտագաղթի գլխավոր պատճառը» աշխարհահռչակ շանսոնյեն ասել է. «Այնտեղ մարդկանց օգնելու համար ոչինչ չի արվում։ Ընդհակառակը, մաֆիայի անդամների մասին սարսափելի պատմություններ գիտեմ։ Կարողանում են այնպես անել, որ գյուղացին սոված մնա իր իսկ հողի վրա։ Մաֆիայի այդ անդամներին պետք է գնդակահարել։ Այդպես այլևս չի կարող շարունակվել։ Ցանկանում եք անդամակցել մաֆիայի՞ն։ Գնացեք ձեր մաֆիան ուրիշ երկրներում հիմնեք։ Սակայն դա ձեր երկրում մի արեք, ձեր ժողովրդի դեմ մի արեք»։

Խոսելով հայ–թուրքական հարաբերությունների մասին՝ Ազնավուրն ասել է, որ ցանկանում է հայ–թուրքական սահմանի շուտափույթ բացում։ «Ես հաշտեցում եմ ցանկանում։ Թուրքերը պետք է ընդունեն այն, ինչ տեղի է ունեցել։ Սակայն չեմ կարևորում Ցեղասպանություն եզրույթը։ Ի՞նչ է ինձ համար փոխելու այդ բառի գործածումը»,– ասել է Ազնավուրը` նշելով, որ թուրքերի հետ հաշտեցման գործընթացը պետք է սկսել նրանց հայկական ջարդերի մասին ճիշտ տեղեկությունների մատուցմամբ։ «Թուրքերին սխալ և սուտ բաներ են սովորեցրել։ Մենք էլ պետք է նրանց ճշմարտությունը մատուցենք… Թուրքիայի սահմանամերձ շրջանների բնակչությունն ամենևին էլ դեմ չէ հայերին։ Անգամ Դիարբեքիրի քաղաքապետը հրապարակավ խոսում է ճանաչման անհրաժեշտության մասին։»,– ասել է շանսոնյեն։

Ի պատասխան այն հարցին, թե «Հայաստանի 3 նախագահներին էլ ճանաչում եք։ Նրանցից ո՞ր մեկի մասին կցանկանայիք խոսել, Ազնավուրը պատասխանել է. «Նրանք բոլորն էլ բարի նպատակների տեր մարդիկ են։ Սակայն որոշ իրավիճակներ կարողանում են փոխել նպատակն ու կամքը… Առնվազն նախագահներից ոչ մեկն ինձ «ոչ» չի ասել»։

Նշելով, որ այսօր ինքը փորձում է իր համար բացահայտել, թե ի՞նչ է նշանակում հայ լինել, Շառլ Ազնավուրն ասել է. «Այսօր ցանկանում եմ իմանալ՝ ի՞նչ է նշանակում հայ լինել։ Ի՞նչ է նշանակում սփյուռքահայ լինել՝ լավ ուտե՞լ, թե՞ լավ խմե՞լ։ Մի՞թե հայ լինել նշանակում է ունենալ բուտիկ և խոսել Հայոց ցեղասպանությունից»։