Տարածաշրջանային էներգետիկայի շուրջ

Հոկտեմբերի 7-ի առավոտյան Երեւանում` նախագահի նստավայրում տեղի ունեցած համատեղ մամուլի ասուլիսի ընթացքում, Հայաստանի եւ Ֆրանսիայի նախագահներն անդրադարձ են կատարել էներգետիկ հարցերին:
Սերժ Սարգսյանը մասնավորաբար հայտարարել է, որ Հայաստանն ըմբռնումով է մոտենում էներգետիկ դիվերսիֆիկացման եվրոպական ջանքերին, որոնք արտահայտվում են նաեւ մեր տարածաշրջանում էներգատարների նախագծերով: Սակայն, Սերժ Սարգսյանը միեւնույն ժամանակ ասել է, որ Հայաստանը դրանցում ակնկալում է հավասարակշռված մոտեցում, որը կապահովի տարածաշրջանի երկրների համաչափ զարգացում, այլ ոչ թե այդ նախագծերը կվերածվեն պատերազմ սնուցող աղբյուրների:
«Մենք ակնկալում ենք նաև Եվրամիության այդ նույն երկրների ուշադիր վերաբերմունքը մեր երկրի անվտանգության և մեր տարածաշրջանի կայունության խնդիրներին»,– հայտարարել է Հայաստանի նախագահը:
 Ըստ Սերժ Սարգսյանի, Եվրամիությունը պետք է այնպիսի ծրագրեր իրականացնի, որոնք տարածաշրջանային ինտեգրացիային միտված լինեն եւ ծառայեն խաղաղությանը, ոչ թե պատերազմին:
Ուշագրավ հայտարարություն է արել Ֆրանսիայի նախագահ Սարկոզին, ասելով, որ առաջիկայում Ֆրանսիայից Հայաստան կգա աշխատանքային խումբ, որը կուսումնասիրի ատոմային էներգետիկայի բնագավառում մեր երկրին օժանդակելու հնարավորությունները: Սարկոզին հայտարարել է, որ կանեն հնարավորը, որպեսզի Հայաստանին օգնեն գտնել էներգիայի նոր աղբյուրներ:
 Ֆրանսիայի նախագահ Նիկոլա Սարկոզին հայտարարել է, որ Հայաստանը կարող է ապավինել Ֆրանսիայի բարեկամությանը: Նա նշել է, որ Կովկասը կարեւոր տարածաշրջան է աշխարհի համար եւ Հայաստանն էլ գտնվում է քաղաքակրթությունների եւ խոշոր պետությունների` Ռուսաստանի, Թուրքիայի եւ Իրանի հատման կետում:
Սարկոզին նաեւ հանդես է եկել Ադրբեջանի հետ խաղաղություն հաստատելու ուղին շարունակելու կոչով, որով դիմել է Սերժ Սարգսյանին: Սարկոզին Սարգսյանին նաեւ կոչ է արել շարունակել հայ-թուրքական կարգավորման ուղղությամբ ջանքերը եւ հայտնել, որ Ֆրանսիան սատարում է այդ ջանքերին: Սարկոզին հայտարարել է, որ 21-րդ դարում անընդունելի է փակ սահման ունենալը: