Լավրովն Ուկրաինայի իշխանություններից պահանջել է անհապաղ դադարեցնել բանակի օգտագործումը երկրի արևելքում

Մոսկվան հարգում է Ուկրաինայում կայացած ընտրությունների արդյունքները: Այդ մասին հայտարարել է ՌԴ-ի արտաքին գործերի նախարար Սերգեյ Լավրովը` ամփոփելով Համագործակցության ռուս-թուրքական բարձր մակարդակի խորհրդի նիստի արդյունքները:

«Ընտրությունները կայացան, մենք հարգում ենք Ուկրաինայում կամաարտահայտման արդյունքները, բայց միանգամայն անհրաժեշտ ենք համարում առանց հապաղելու կատարել այն, ինչն ամրագրված է Ժնևում՝ դադարեցնել ցանկացած բռնություն»,- ընդգծել է Լավրովը: Նա երկրի հարավ-արևելքում արյունահեղության դադարեցումը համարել է «Կիևի իշխանությունների թիվ մեկ խնդիրը և նրանց ամրության ստուգումը»:

«Մեզ խիստ անհանգստացնում է այն, որ ոչ միայն բուն ընտրություններն անցան շարունակվող մարտական գործողությունների պայմաններում, այլև դրանց ավարտվելուց անմիջապես հետո հրաման է տրվել այսպես կոչված «հակաահաբեկչական գործողությունն» ինտենսիվացնելու մասին,-շարունակել է նախարարը:- Երկու կողմից կան զոհեր, տուժում են լրագրողները՝ հակառակ միջազգային կազմակերպությունների կողմից հնչող բոլոր կոչերին ու պահանջներին»:

Ավելի վաղ Ուկրաինայի ներքին գործերի նախարարի պաշտոնակատար Արսեն Ավագովը հավաստել է, որ Դոնեցկում իշխանությունների կողմից իրականացված ուժային գործողության հետևանքով կան բազմաթիվ զոհեր: Ավակովը հայտնել է, թե չգիտի զոհվածների ստույգ թվաքանակը, բայց ենթադրում է, որ խոսքը «տասնյակ մարդկանց» մասին է:

Մինչդեռ Դոնեցկի Ժողովրդական Հանրապետության վարչապետ Դենիս Պուշիլինն ասել է, որ Դոնեցկում մայիսի 26-ի մարտերի հետևանքով զոհվել են շուրջ 100 աշխարհազորայիններ և խաղաղ բնակիչներ:

Իր հերթին Դոնեցկի քաղաքագլուխը հաստատել է, որ առնվազն 40 մարդ է զոհվել բանակային գործողության հետևանքով, որը քաղաքում անցկացնում են ուկրաինացի ուժայինները, հաղորդել է ԻՏԱՌ-ՏԱՍՍ-ը: