ԱՄՆ-ն Աֆղանստանից իր զորքն ամբողջովին դուրս կբերի մինչև 2016 թվականը

ԱՄՆ-ն ավարտում է իր ռազմական առաքելությունն Աֆղանստանում: Մինչև 2015 թվականի սկիզբը երկրի տարածքում կմնան 9,8 հազար ամերիկացի զինծառայողներ, եկող տարվա վերջին նրանց թիվը կրկնակի կկրճատվի, իսկ ևս մեկ տարի անց պլանավորվում է ամերիկյան զորքերն ամբողջովին դուրս բերել հանրապետության տարածքից: Այդ մասին հայտարարել է ԱՄՆ-ի նախագահ Բարաք Օբաման` ելույթ ունենալով Սպիտակ տանը:

«Մենք ավարտում ենք այն աշխատանքը, որն սկսել էինք: Վերջին մի քանի տարվա ընթացքում մենք աշխատում էինք երկրի անվտանգության համար պատասխանատվությունը փոխանցել աֆղան ժողովրդին,- ասել է Օբաման:- Մեկ տարի առաջ աֆղանական զորքերն ստանձնեցին ռազմական գործողությունների հրամանատարությունը: Այդ ժամանակվանից նրանց թվաքանակն ու հզորությունը շարունակում էր աճել: Դա իր հերթին մեզ թույլ տվեց մեր սեփական զորքերի թվաքանակն Աֆղանստանում 100 հազարից կրճատել մինչև մոտավորապես 32 հազար»:

«2014 թվականը շրջադարձային է լինելու: Մեր դաշնակիցների և Աֆղանստանի կառավարության հետ միասին մենք որոշում ենք ընդունել, որ այս տարի կավարտենք մեր ռազմական առաքելությունն Աֆղանստանում»,- ասել է պետության ղեկավարը, հաղորդել է ԻՏԱՌ-ՏԱՍՍ-ը: