Աբխազիայի նախագահը ջանում է կանխել իրադարձությունների ծավալումը «երկրի համար անուղղելի սցենարով»

Աբխազիայի նախագահ Ալեքսանդր Անկվաբը հայտարարել է, որ իշխանությունները ձեռնարկում են բոլոր միջոցները, որպեսզի հանրապետությունում իրադարձությունները ծավալվեն օրինական հունով, «այլ ճանապարհ պարզապես չկա»:

Աբխազիայում ընդդիմությունը պահանջում է նախագահի պաշտոնաթողությունը և իշխանության համակարգի բարեփոխում: Մայիսի 27-ի երեկոյան ընդդիմության ներկայացուցիչները հսկողություն են հաստատել վարչակազմի շենքի նկատմամբ և հայտարարել, որ իրենց ձեռքն են վերցնում հանրապետության ժամանակավոր կառավարումը:

«Ես ոչ մի տեղ չեմ մեկնել: Գտնվում եմ Աբխազիայում: Անվտանգության խորհրդի անդամների հետ քննարկում ենք իրադարձությունների զարգացման տարբերակներ: Իմ և գործընկերներիս գործողությունների նպատակը մեկն է եղել՝ թույլ չտալ իրադարձությունների զարգացում այնպիսի սցենարով, որն անուղղելի կլիներ մեր երկրի համար»,- ասել է Անկվաբը:

Նա պատմել է, որ ընդդիմության հանրահավաքից հետո բանակցություններ են անցկացվել նրա համակարգող խորհրդի ներկայացուցիչների հետ, որոնց ընթացքում քննարկվել են իրադրության նորմալացման ուղիները: Մասնավորապես, նրա խոսքով, առաջադրվել են նախագահի, նախարարների կաբինետի, գլխավոր դատախազի և Տկվարչելիի ու Գալիի շրջանների ղեկավարների պաշտոնաթողության կտրական պահանջներ: Այդ հարցերի շուրջ դռնփակ քննարկում անցկացնելու խնդրանքին ի պատասխան ընդդիմության ներկայացուցիչները լքել են բանակցությունները և վերադարձել իրենց կողմնակիցների մոտ, ինչից հետո սկսվել է վարչակազմի շենքի գրավումը, հայտնել է Անկվաբը:

Նա ընդգծել է, որ «ուժայինները հավատարիմ են պետությանը և ձեռնարկում են բոլոր միջոցները՝ կայունացնելու իրադրությունը»: «Մենք կշարունակենք գործադրել բոլոր ջանքերը, որպեսզի իրադարձությունները ծավալվեն օրինական հունով: Ես վստահ եմ, որ այլ ճանապարհ պարզապես չկա»,- ասել է Աբխազիայի նախագահը, հաղորդել է ՌԻԱ Նովոստին: