Թուրքիայի տարածքում սեյսմիկ ակտիվությունը շարունակվում է

Թուրքիայի տարածքում շարունակվում է վերջին մեկ շաբաթվա ընթացքում առաջ եկած սեյսմիկ ակտիվությունը: Մայիսի 28-ի վաղ առավոտյան Թուրքիայի տարածքում երեք երկրաշարժ է գրանցվել: 4.5 մագնիտուդ ուժգնությամբ երկրաշարժ է տեղի ունեցել Սարոսի ծոցում, որի էպիկենտրոնը գտնվել է 13,3 կմ խորության վրա: Երկրաշարժը զգացվել է Չանաքլը և հարևան շրջաններում: Եվս երկու երկրաշարժ' 4.3 և 4.2 մագնիտուդ ուժգնությամբ, տեղի են ունեցել Էրզրումում (Կարին) և Կարսում: Ստորգետնյա ցնցումների պատճառով ավերածություններ ևզոհեր չեն գրանցվել:

Թուրքական լրատվական գործակալությունը հայտնել է, որ մայիսի 27-ին տեղական ժամանակով ժամը 13:16-ին 4.3 բալ ուժգնությամբ երկրաշարժ է տեղի ունեցել Վանում, որի էպիկենտրոնը գտնվել է 10,5 կմ խորության վրա: Ստորգետնյա ցնցումները խուճապ են առաջացրել Վանում և հարևան գյուղերում: Թուրքիայի Սեյսմիկ ծառայությունը հայտնել է, որ երեկ ժամը 00:28-ին 4.1 բալ ուժգնությամբ երկրաշարժ է տեղի ունեցել նաև Էգեյան ծովում, որի էպիկենտրոնը գտնվել է 11,8 կմ խորության վրա:

Մայիսի 24-ին Էգեյան ծովում 5.3 բալ ուժգնությամբ երկրաշարժ էր տեղի ունեցել, որին հաջորդել էին 13 հետցնցումներ: Երկրակեղևի ցնցումները զգացվել էին նաև Ստամբուլում, Իզմիրում, Էդիռնեում, Բոլուում, Չանաքքալեում, Էսքիշեհիրում: Որոշ բնակելի շրջաններում շինությունների վրա ճեղքեր էին առաջացել: Շատ բնակիչներ խուճապի հետևանքով իրենց ցած էին նետել պատուհաններից և տարբեր աստիճանի վնասվածքներ ստացել: