«Ուկրաինացիները չեն մոռանում, որ երկրի ազատ ապագայի պայքարում առաջին զոհը հայ է». ուկրաինացի փորձագետ

Ուկրաինացի փորձագետը կարծում է, որ հայ-ուկրաինական ջերմ ու բարեկամական հարաբերությունները չեն կարող խաթարվել: Երևանում կայացած «Ուկրաինայում նախագահական ընտրությունները և դրա հավանական ազդեցությունը ԱլԳ տարածաշրջանի, մասնավորապես` Հայաստանի ներքին և արտաքին քաղաքականության վրա» թեմայով կլոր-սեղան քննարկման ժամանակ տեսակամուրջի միջոցով այս մասին հայտնեց Արևելյան գործընկերության բոլոր վեց երկրներում իրականացվող «Երկխոսություն քաղաքացիական հասարակության հետ` հանուն առաջընթացի» ծրագրի ներկայացուցիչ Ալեքսեյ Սոլդատենկոն: Հարցին, թե ինչպիսին է հայ-ուրաինական հարաբերությունների հեռանկարը` հաշվի առնելով ՄԱԿ-ում Հայաստանի քվերակությունը Ղրիմի հանրաքվեի օգտին, ուկրաինացի քաղաքացիական հասարակության ներկայացուցիչը նշեց. «Հայաստանի քվերակությունը Ղրիմի հանրաքվեի օգտին պրակտիկորեն չի ազդել ուկրաինական հասարակության` հայերի նկատմամբ ունեցած դրական վերաբերմունքի վրա, չի ազդի նաև հետագա Հայաստան-Ուկրաինա հարաբերությունների վրա: Ես չգիտեմ, թե ինչքան մարդ գիտի այդ քվերակության մասին, բայց մեզ մոտ ավելի շատ մարդ գիտի, որ Ուկրաինայի եվրոպական ապագայի և ազատ ապագայի համար Մայդանում առաջին զոհը հայ է եղել: Հայ և ուկրաինացի ժողովուրդների միջև ջերմ ու բարեկամական հարաբերությունները չեմ կարծում, որ կխաթարվեն»,- ասաց փորձագետը:

Կապված այն մտահոգությունների հետ, որ Ուկրաինան դուրս է գալու ԱՊՀ կազմից և երկիր մուտքի համար գործելու է վիզային ռեժիմ` փորձագետը նշեց, որ չի կարծում` Հայաստանի, Վրաստանի ու հետխորհրդային մյուս երկրների հետ հաստատվի վիզային ռեժիմ: «Ուկրաինան ԱՊՀ տարածքից դուրս գալու մասին հայտնել է դեռ մարտին, ներկայում փաստաթղթերը գտնվում են Գերագույն Ռադայում: Վիզայի ռեժիմի ներդրման առումով կարող եմ ասել, որ այն այս պահին դարձել է հռետորական հարց, քանի որ ռուսական սահմանն Ուկրաինայի համար դարձել է ռազմական վտանգի աղբյուր: Եվ մենք հասկանում ենք, որ այդ սահմանը պետք է ուղղակի փակվի: Մյուս պատճառը սահմաններ փակելու. եթե Ուկրաինան ուզում է ԵՄ-ի հետ ունենալ առանց վիզայի ռեժիմ, պետք է Եվրոպային ցույց տա, որ վերահսկում և անվտանգ է պահում իր բոլոր սահմանները: Ես չեմ կարծում, որ դա կբերի վիզային ռեժիմի հաստատման մեր հետսովետական ընկերների հետ, առավել ևս Վրաստանի ու Հայաստանի հետ»,-ասաց Ալեքսեյ Սոլդատենկոն:

Խոսելով Ուկրաինայում հետընտրական իրավիճակի և երկրում կայություն հաստատելու քայլերի մասին` Ալեքսեյ Սոլդատենկոն ասաց, որ Ուկրաինայի քաղաքացիների տրամադրվածությունը նախագահական ընտրություններից հետո դրական է, նրանք ակնկալում են կտրուկ փոփոխություններ ու կայունության վերականգնում: «Եթե նայենք ընտրությունների արդյունքներին, կտեսնենք, որ այն տրամաբանական շարունակությունն է այն գործընթացների, որոնց մենք ձգտում էինք Եվրամայդանի միջոցով: Երկրորդը` երևի թե Ուկրաինայի պատմության մեջ առաջին անգամ ընտրության արդյունքները հավասար են երկրի բոլոր շրջաններում. գրեթե բոլոր շրջաններում Պորոշենկոն զբաղեցրել է առաջին տեղը: Սոցիոլոգները նաև ասում են, որ Պորոշենկոյի հաղթանակը պատահական չէ, քանի որ նա ասոցացվում է փոփոխություների, ԵՄ-ի հետ ինտեգրման, ինչպես նաև մեր հարևան Ռուսաստանի հետ պրագմատիկ հարաբերությունների հաստատելու հետ»,-նշեց Ալեքսեյ Սոլդատենկոն:

Նրա խոսքով` ներկայում քաղաքական գործընթացների երկու կարևոր հարցերը կապված են երկրի արևելքում տիրող իրավիճակի և երկրում արտահերթ խորհրդարանական ընտրություններ անցկացնելու հետ:

Անդրադառնալով նախագահ ընտրված Պյոտր Պորոշենկոյի այն հայտարարությանը, որ վաճառելու է իր բիզնեսները, որպեսզի ազատվի օլիգարխի «կոչումից»` ուկրաինացի փորձագետը փաստեց, որ այդ քայլը ինքնին ենթադրելի էր ու պահանջված ուկրանական հասարակության կողմից, որը արմատական փոփոխություններ է ակնկալում:

Ուկրաինայում նախագահական ընտրությունները տեղի են ունեցել մայիսի 25-ին: ՀՀ նախագահ Սերժ Սարգսյանն շնորհավորական ուղերձ է հղել Ուկրաինայի նոր ընտրված նախագահ Պյոտր Պորոշենկոյին: