Պաշտոնական Թբիլիսին անհանգստացած է Աբխազիայում ստեղծված իրադրությունից

Աբխազիայի իրադրությունն է եղել Վրաստանի արտաքին գործերի առաջին փոխնախարար Դավիթ Զալկալիանիի և Ժնևի միջազգային կոնսուլտացիաներում ԵԱՀԿ-ի հատուկ ներկայացուցիչ, այդ կոնսուլտացիաների համանախագահ Անջելո Գնեդինգերի միջև կայացած հեռախոսազրույցի գլխավոր թեման: Այս մասին տեղեկացնում է «Գրուզիա Online»-ը:

Վրաստանի ԱԳ նախարարության տեղեկատվության համաձայն՝ հեռախոսազրույցի ընթացքում Դավիթ Զալկալիանին վրացական կողմի խիստ անհանգստությունն է հայտնել Աբխազիայում ստեղծված իրադրության կապակցությամբ և ընդգծել է այդ գործընթացներում համաշխարհային հանրակցության ներկայացուցիչների և, առաջին հերթին, Ժնևյան կոնսուլտացիաների համանախագահների ակտիվ ներգրավման անհրաժեշտությունը: Թբիլիսիում այն կարծիքին են, որ դա կկանխի լարվածության հետագա սաստկացումը:

Դավիթ Զալկալիանին Աբխազիայում տեղի ունեցող տագնապալի գործընթացների կապակցությամբ անհանգստություն է հայտնել նաև Ժնևյան կոնսուլտացիաներում ՄԱԿ-ի համանախագահ Անտի Տուրունենի հետ կայացած զրույցի ընթացքում: Նույն այդ տեղեկատվությունը Բրյուսելում Վրաստանի առաքելության միջոցով փոխանցվել է Ժնևի կոնսուլտացիաներում Եվրամիության համանախագահին:

Ավելի վաղ «Միասնական ազգային շարժման» առաջնորդներից մեկը՝ Դավիթ Բաքրաձեն, Աբխազիայի իրադարձությունների կապակցությամբ Վրաստանի կառավարությանը մեղադրել էր անգործության և անտարբերության մեջ և կոչ էր արել անհապաղ դիվանագիտական միջոցներ ձեռնարկել Աբխազիայի բռնակցումը կանխելու համար: