Աբխազիայի նախագահն ընդդիմության հետ հանդիպելու համար սպասում է Մոսկվայի միջնորդների ազդանշանին

Ընդդիմության հետ Մոսկվայի միջնորդությամբ բանակցություններն ակտիվորեն են ընթանում, բոլորը շահագրգռված են կանխելու ճգնաժամը: Այդ մասին մայիսի 30-ին հայտարարել է Աբխազիայի նախագահ Ալեքսանդր Անկվաբը:

«Որոշվել են միջնորդները, երեկ նրանք արդեն հանդիպել են (ընդդիմության հետ), և մենք սպասում ենք այդ հանդիպումները շարունակելու ազդանշանին»,-հայտարարել է Անկվաբը Կոմերսանտ FM ռադիոկայանին տված հարցազրույցում:

«Ես նրանց հետ մեկ անգամ չէ, որ հանդիպել եմ: Ռաշիդ Գումարովիչն (Նուրգալիև) այստեղ է, նա շարունակում է աշխատել, նա հանդիպումներ է ունենում ընդդիմության ներկայացուցիչների, իշխանության մարմինների ներկայացուցիչների, ուժայինների հետ և շատ մեծ աշխատանք կատարում: Վլադիսլավ Յուրևիչը (Սուրկով) նույնպես մեկ անգամ չէ, որ հանդիպում է ունեցել ընդդիմության ներկայացուցիչների հետ: Բոլորը տրամադրված են գործել այնպես, որ իրադրությունը չվերածվի քաոսի»,-հայտարարել է Ալեքսանդր Անկվաբը:

Մինչդեռ, ինչպես ՌԻԱ Նովոստիին հայտնել է Աբխազիայի ընդդիմադիրների առաջնորդ, հանրապետության նախկին փոխնախագահ Ռաուլ Խաջիմբան, իրենց գլխավոր պահանջը նախագահ Ալեքսանդր Անկվաբի հրաժարականն է: «Նախագահի հրաժարական՝ առաջին հերթին: Իսկ մնացած ամեն ինչ շղթայի օղակներն են»,-նշել է նա:

Դրա հետ մեկտեղ Խաջիմբան, որը նախօրյակին ընտրվել է ընդդդիմադիր «ժողովրդական վստահության ժամանակավոր խորհրդի» ղեկավար, ընդգծել է, որ ներկայիս իշխանությունների հետ երկխոսությունը շարունակվում է: «Առայժմ խոսակցությունը, ինչպես ասվում է, շարունակվում է: Թե ինչ արդյունք կլինի, ցույց կտա ժամանակը»,-ասել է նա:

Խաջիմբայի խոսքով՝ այժմ հանրապետությունում իրադրությունը նորմալ է: «Իրադրությունը հանգիստ է, ոչ մի էքսցես»,-ասել է նա:

Մայիսի 29-ին Աբխազիայի խորհրդարանը որոշում է ընդունել հանրապետության վարչապետին անվստահություն հայտնելու մասին և առաջարկել է Աբխազիայի նախագահին կամավոր վայր դնել լիազորությունները: Բացի «ժամանակավոր խորհրդից», աբխազական ընդդիմությունը մտադիր է երկու օրվա ընթացքում կազմել ժամանակավոր կառավարություն, որը կաշխատի մինչև նախագահական ընտրությունները, որոնք Անկվաբի հրաժարականի դեպքում կանցկացվեն երեք ամսվա ընթացքում: