ԱՄՆ հաջորդ նախագահ կարող է դառնալ Հիլարի Քլինթոնը

Համաշխարհային մամուլի առաջին էջերում ԱՄՆ նախագահ Բարաք Օբամայի և նախկին պետքարտուղար Հիլարի Քլինթոնի ոչ պաշտոնական ընթրիքի վերաբերյալ վերլուծական հոդվածներն ու մեկնաբանություններն են:

Հետաքրքրությունը ոչ պաշտոնական ընթրիքի հետ բացատրվում է նաև այն հանգամանքով, որ հանդիպման հաջորդ օրը Օբաման Սպիտակ տանը հայտարարել է, որ Հիլարին կարող է դառնալ շատ արդյունավետ նախագահ, եթե համաձայնի մասնակցել 2016թ. նախագահական ընտրություններին: The Guardian-ի փոխանցմամբ` Դեմոկրատական կուսակցությունն այս պահին նախագահի հարմար թեկնածու չունի, և թեպետ Քլինթոնը դեռևս չի հայտարարել նախագահի թեկնածու դառնալու մտադրության մասին, այնուամենայնիվ, այդ փաստն ԱՄՆ-ում և ամբողջ աշխարհում ոչ ոք չի բացառում: Թերթը կարծում է, որ Օբամայի հայտարարությունը կարելի է ընկալել որպես աջակցություն, և այժմ գլխավոր հարցն այն է, թե Քլինթոնը երբ կհայտարարի առաջադրման մասին:

Ռուսական Gazeta.ru կայքն էլ զրուցել է «Քարնեգի» հիմնադրամի մոսկովյան կենտրոնի փորձագետ Մարիա Լիպմանի հետ: Վերջինիս գնահատմամբ, Քլինթոնն անկասկած ուժեղ թեկնածու է: «Բոլորն են հիշում, թե վեց տարի առաջ նախագահական ընտրություններին ընդառաջ ինչպես շատ սուր պայքարում նա տեղը զիջեց Օբամային: Քլինթոնն, իհարկե, կառաջադրվի, դա վաղուց էր հայտնի, սակայն այս պարագայում էական դեր է խաղում այն փաստը, թե էլ ով կառաջադրվի որպես նախագահի թեկնածուի հավակնորդ: Կարող են անսպասելի մարդիկ հայտնվել, ինչպես իր ժամանակին հայտնվեց Օբաման, ով քիչ հայտնի քաղաքական գործիչ էր, բայց ուներ նպատակասլացություն և կիրք, ինչի շնորհիվ էլ կարողացավ զանգվածային ճանաչման արժանանալ»,- ասում է փորձագետը: Լիպմանի խոսքով` Քլինթոնը փրայմերիզների հետ որևէ խնդիր չի կարող ունենալ, քանի որ նա ոչ միայն իմունիտետ է ձեռք բերել Օբամայի դեմ պայքարելու ժամանակ, այլև քաղաքական ընտանիքից է, աջակցել է ամուսնուն, երբ նա ԱՄՆ նախագահ էր և, բնականաբար, Դեմոկրատական կուսակցությունը կպաշտպանի նման թեկնածուին: Թեպետ խոսակցություններ կան, որ ԱՄՆ փոխնախագահ Ջո Բայդենն էլ կարող է առաջադրվել որպես թեկնածու, սակայն Սպիտակ տան կուլիսներում ասում են, որ դա ընդամենը քաղաքական ավանդույթը պահելու համար է:

Թեպետ կանխատեսելի է, որ փոխնախագահը նախագահ դառալու հավականություններ կարող է ունենալ, սակայն Բայդենի ամենամեծ խնդիրն իր տարիքն է. այս պահին նա 72 տարեկան է, նախագահական ընտրությունների ժամանակ կլինի 74:

BBC-ն էլ Քլինթոնի հավանական մրցակիցների ցանկն է կազմել: «Հանրապետականներից ո՞վ կարող է մրցել Քլինթոնի դեմ» հոդվածում, BBC-ն նշում է, որ հակառակորդ կուսակցությունն առայժմ ակտիվ չէ, և թեկնածուների հավանական ցանկ կարծես թե չկա: Քլինթոնի հավանական մրցակիցը կարող է լինել Միթ Ռոմնին, սակայն նա պարտվեց Օբամային նախորդ ընտրություններում, և նրա վարկանիշը շատ ցածր է:

Ըստ CNN-ի, Հանրապետական կուսակցությունն ունի նույն խնդիրը, ինչ 2008թ.: Կուսակցությունը կարծես թե բաժանված է երկու հավասար հատվածի' ծայրահեղ-պահպանողականներ և առավել լիբերալներ: Այս առումով շատ բարդ կլինի գտնել թեկնածուի, ով կկարողանա ստանալ կուսակցության ընդհանուր աջակցությունը:

Սա Հիլարի Քլինթոնի վերջին խոշոր ընտրությունն է: Նա 67 տարեկան է, և եթե նախկին առաջին տիկինն այս անգամ չառաջադրվի, կարելի է համարել, որ նրա քաղաքական կարիերան ավարտվեց' նախագահ չդարձած: Նա կմնա պատմության մեջ որպես լավագույն կին-քաղաքական գործիչներից մեկը: