Աբխազիայի խորհրդարանը արտահերթ նախագահական ընտրությունների օր է նշանակել օգոստոսի 24-ը

Աբխազիայի խորհրդարանը երկրում նախագահական արտահերթ ընտրությունների օր է նշանակել օգոստոսի 24-ը, իսկ մինչ այդ նախագահի պարտականությունները կկատարի խորհրդարանի խոսնակ Վալերի Բգանբուն: Ինչպես հաղորդում է ԻՏԱՌ-ՏԱՍՍ-ը, համապատասխան որոշմանը կողմ է քվեարկել 24 պատգամավոր, 1 պատգամավոր ձեռնպահ է մնացել:

Աբխազիայի կենտրոնական ընտրական հանձնաժողովին հանձնարարվել է քայլեր ձեռնարկել արտահերթ ընտրությունների կազմակերպման համար: «Որոշումն ընդունվել է կապված այն բանի հետ, որ Ալեքսանդր Անկվաբան ընդունակ չէ իրականացնել Աբխազիայի Հանրապետության նախագահին վերապահված լիազորությունները և պարտականությունները, ինչպես նաև Ազգային ժողովում հանրապետության վարչապետին անվստահություն հայտնելու փաստի և պետության ներսում համազգային համաձայնության և կայունության պահպանման հետ կապված»,- ասված է որոշման փաստաթղթում: