Օբաման Եվրոպա կատարած այցի ժամանակ կհանդիպի Պորոշենկոյի հետ. Սպիտակ տուն

ԱՄՆ նախագահ Բարաք Օբաման կուղևորվի Եվրոպա: Այդ ընթացքում Վարշավայում նա կհանդիպի Ուկրաինայի նորընտիր նախագահ Պյոտր Պորոշենկոյի հետ։ Այս մասին հայտնում է itar-tass-ը:

«Օբաման կայցելի Լեհաստան, Բելգիա և Ֆրանսիա: ԱՄՆ նախագահի եվրոպական շրջագայության գլխավոր նպատակը կդառնա «տրանսատլանտյան կապերի ամրապնդումն» ԱՄՆ-ի դաշնակիցների հետ, այդ թվում`ուկրաինական ճգնաժամի հետ կապված»,- հայտնել է Սպիտակ տան արտաքին քաղաքականության հարցերով գլխավոր խորհրդական Բեն Ռոդսը:

Հունիսի 2-ին Օբաման կժամանի Վարշավա, որտեղ Լեհաստանի նախագահ Բրոնիսլավ Կոմորովսկու հետ միասին հանդիպում կունենա լեհ և ամերիկացի զինվորական օդաչուների հետ, որոնք Լասկի ավիահանգրվանում մասնակցում են համատեղ պատրաստության ծրագրին: Նույն օրը ԱՄՆ-ի նախագահը հանդիպում կունենա Լեհաստանի վարչապետ Դոնալդ Տուսկի հետ, իսկ այնուհետև կմասնակցի Կենտրոնական և Արևելյան Եվրոպայի երկրների ղեկավարների հետ խորհրդակցությանը:

Գտնվելով Վարշավայում՝ Օբաման հունիսի 4-ի առավոտյան հանդիպում կանցկացնի Պորոշենկոյի հետ:

Նույն օրը ԱՄՆ-ի նախագահը կմեկնի Բրյուսել, որտեղ հանդիպում կունենա բելգիացիների թագավոր Ֆիլիպի հետ, իսկ այնուհետև կմասնակցի «յոթնյակի» գագաթնաժողովին:

Հունիսի 6-ին Օբաման կուղևորվի Նորմանդիա՝ մասնակցելու դաշնակիցների ափհանման 70-ամյակի կապակցությամբ կայանալիք հանդիսություններին, այդ թվում՝ Երկրորդ աշխարհամարտի տարիներին հիտլերյան ֆաշիզմի դեմ պայքարած երկրների ղեկավարների համատեղ ճաշկերույթին: